Promovimi i të rinjve e ”dogji”, Edi Rama rrezikon të mos jetë më as deputet

Në këto zgjedhje të Përgjithshme Parlamentare, u regjistrua një pjesëmarrje e jashtëzakonshme dhe rezultati pritet që të jetë i ngushtë, në favor të opozitës së bashkuar. Kryeministri Edi Rama, nga ana tjetër, rrezikon të mos jetë më në Parlament as si deputet. Bazuar në rezultatet e projeksioneve të bëra nga mediat si: Top Channel, Euronews, Syri Tv, Ora News dhe Dosja.al, opozita fiton bindshëm.

Referuar parashikimeve të qarqeve ku Rama garon për deputet, duket se kryeministri është në ”vijën e rrezikut” në Durrës dhe Vlorë. Ishte vetë kryeministri ai që vendosi që të krye të listave të rreshtonte të rinjtë, por duket se nga kjo gjë po e pëson vetë. Sipas sondazhit të Top-Channel, në Durrës, Partia Socialiste merr tetë mandate, por i fundit, mbetet gjithmonë me pikëpyetje.

Në bazë të projeksionit të Dosja.al, PS-ja merr gjashtë mandate, duke lënë jashtë Lefter Kokën dhe Edi Ramën. I fundit që e mbyll 6-shen, është Rrahman Rraja, një prej më të përmendurve gjatë mandatit të dytë të Ramës për “bëmat” e djalit dhe nipërve të tij. Po ashtu, edhe Exit Poll i Oranews i Antonio Notto i jep PS-së 40-44% të mandative (më pak se gjysma nga 14 që janë gjithësej), duke lënë sërish jashtë krryeministrin Rama.

Për të pasur rezultate më të sakta, mbetet që të presim të mbarojë numërimi i votave, që do të tregojë nëse kryeministri Edi Rama do të jetë më në Parlament si deputet, apo do t’i ndjekë ngjarjet nga jashtë.