Protesta për Klodianin zhvendoset tek Kryeministria: Jemi tek koka e KRIMIT, tek Edi Rama

Aktualitet Kryesore E Mërkurë, 9 Dhjetor 2020 17:23

Protesta masive që nisi para godinës së Ministrisë së Brendshme është zhvendosur para Kryeministrisë. Megjithë shiun e rrëmbyeshëm mijëra qytetarë kanë dalë në tubim për të kërkuar drejtësi për vrasjen nga policia të 25-vjeçarit, Klodian Rasha. Qytetarët kërkojnë drejtësi dhe dorëheqjen e ministrit të Brendshëm, Sandër Lleshaj.

Një prej protestuesve u shpreh për gazetarët se të gjithë do të shkonin tek ai që u cilësua tek koka e krimit. ”Do ikim atje, tek koka e krimit, tek Edi Rama”,-tha qytetari. Shokët e viktimës kanë qenë të pranishëm në protestë , ku njëri prej tyre me lot në sy i është drejtuar një efektivi i policie se kë po mbronte, pasi në vend të Klodianit mund të ishte kushdo, mund të ishte edhe nipi i tij. “Mund të ishte nipi yt që kthehet në shtëpi, kë po mbron?”, shprehet shoku i viktimës.

Qytetarët kanë rrëzuar pemën e krishtlindjeve të vendosur para Kryeministrisë. Ndërkohë në tubimin te Ministria e Brendshme pati përplasje me Policinë gjatë momentit që qytetarët tentuan të hyjnë në godinën e ministrisë.

Një gazetar ka mbetur i plagosur gjatë përplasjeve. Andi Llabuti, gazetar i JOQ, është gjakosur nga përplasja me policinë. I lënduar ka mbetur dhe këngëtari Arkimed Lushaj (Stresi), si dhe një punonjës i policisë.