Punonjësit e burgjeve do të testohen për vendin e punës

Të gjithë punonjësit e burgjeve do t’i nënshtrohen testimit për vendin e punës, kjo nisur dhe nga rastet korruptive të hasura rast pas rasti në vendet e vuajtjes së dënimit.

Drejtori i Përgjithshëm i Burgjeve Artur Zoto deklaroi se testimi ka nisur në 8 janar me urdhër të ministrit të Drejtësisë Nasip Naço.

Ndërkohë sa i takon rasteve korruptive në ambientet e vuajtjes së dënimi Zoto ka kërkuar denoncimin e çdo rasti nga të burgosurit apo familjarët e tyre.

"Zhvillimi i një sistemi penitenciar transparent, bashkëkohor dhe të pacënueshëm nga korrupsioni përbën sfidën kryesore të veprimtarisë së Drejtorisë së Përgjithshme të Burgjeve.

Në vecanti lufta kundër korrupsionit në sistemin penitenciar vlerësohet e një rëndësie të vecantë.

Natyrisht, që kjo sfidë nuk mund të perballohet pa mbështetjen e shume aktorëve, institucioneve apo individëve të ndryshem të interesuar në këto çeshtje. 

Me Urdhër të Ministrit të Drejtësisë Nr. 106, datë 08.01.2015 “Për fillimin e procesit të testimit të nivelit aktual të aftësive profesionale, fizike dhe kontrollin psiko-social të punonjësve të Policisë së Burgjeve, të Drejtorisë së Përgjithshme të Burgjeve dhe Institucioneve të Ekzekutimit të Vendimeve Penale” do të kryhet testimi i të gjithë punonjësve me uniformë në sistem.

Testimi do të fokusohet te vlerësimi i aftësive dhe njohurive profesionale si dhe aftësive fizike", tha kreu i burgjeve.