Me debate të forta u shoqërua takimi në Këshillin Bashkiak të Vlorës, ku u tentua për të kaluar një sipërfaqe toke në favor të një firme ndërtimi. Kjo ishte hera e dytë që po përpiqeshin të merrnin këtë tokë, e cila ndodhet në Lungomare dhe është objekt i një procesi gjyqësor, duke u kërkuar që fillimisht të kalonte në pronësi të bashkisë dhe më pas kompanisë ndërtuese “Lazaj 2002”.
Debatet u intensifikuan për shkak të dyshimeve të hedhura nga këshilltarët e djathtë mbi procedurën e ndjekur për kalimin e tokës brenda një kohe të shkurtër, duke theksuar se kjo sipërfaqe nuk mund t’i jepet ndërtuesit pasi ka pronarë në proces.
Ata ngritën akuza ndaj Juristit të Bashkisë, Dorian Demiri, për të cilin u tha se kishte bërë kërkesa të pamatura për regjistrimin e një sipërfaqeje më të madhe se ajo reale.
