Skema e re e aplikimit për strehim – Çfarë ndryshon ligji i ri, kategoritë që mund të përfitojnë

Ligji i ri i strehimit do të ndryshojë mënyrën e aplikimit në këtë program për mbi 32 mijë të pastrehë në të gjithë territorin e vendit.

Ndër risitë përfshihen aplikimi përmes sistemit elektronik online, një numër i dyfishuar programesh sociale dhe një sërë dokumentacioni që duhet plotësuar nga aplikuesit. Sipas të përditshmes Panorama, për herë të parë do të ofrohen edhe grante në masën 10% të vlerës së shtëpisë, për ato familje që nuk kanë mundësitë financiare.

Ligji i ri prezanton edhe konceptin e “pronarit social”, duke detyruar investitorët të bëhen palë me apo pa vullnetin e tyre. Kjo shoqërohet për subjektet që investojnë në banesa sociale me qira apo disponon banesa të tilla për t’i dhënë me qira, me lehtësira pasi i çliron nga tatimi mbi të ardhurat nga qiraja.

Kategoritë që mund të përfitojnë nga skema e re janë:

Familjet që nuk disponojnë banesë në pronësi

-banojnë në banesa që paraqesin rrezik shembjeje;

-banojnë në banesa të mbipopulluara;

-kanë mbetur ose rrezikojnë të mbeten të pastreha, si rezultat i fatkeqësive natyrore

-familjet ose individët që humbasin banesën e tyre si pasojë e zhvendosjes ose zbatimit të një vendimi gjyqësor

Kushtet familjare

-familjet njëprindërore që kanë në ngarkim fëmijë

-të moshuarit që nuk kanë mbushur moshën e pensionit dhe nuk përzgjidhen për t’u strehuar në institucionet publike

-familjet me më shumë se katër fëmijë

-çiftet e reja me moshë totale deri në 60 vjeç

Kushtet sociale

-personat me aftësi të kufizuara dhe invalidët e punës

-personat me statusin e jetimit

-familjet e mbetura të pastreha për shkak të lirimit të banesave ish-pronarëve

-emigrantë të rikthyer, punëtorë emigrantë

-familjet e policëve të rënë në detyrë

-viktimat e dhunës në familje

-viktimat e trafikimit

-vajzat nëna