Spanja vendos kontrolle kufitare ndaj udhëtarëve nga Italia, përshkallëzohet përplasja për emigracionin

Përplasja mes Spanjës dhe Italisë për menaxhimin e flukseve migratore po merr përmasa të reja. Madridi ka rikthyer kontrollet kufitare për pasagjerët që mbërrijnë nga Italia përmes rrugëve ajrore dhe detare.

Masat kanë hyrë në fuqi në mesnatë dhe do të qëndrojnë aktive për një muaj, deri më 7 shtator. Gjatë kësaj periudhe do të kontrollohen dokumentet e udhëtimit, shtetësia dhe vizat e personave që hyjnë në territorin spanjoll nga Italia.

Vendimi i Madridit vjen vetëm një javë pasi Roma vendosi masa të ngjashme për personat që mbërrijnë nga Spanja. Italia e justifikoi vendimin me rrezikun që emigrantët e përfshirë në fluksin e madh drejt enklavës spanjolle të Ceutës të tentojnë të zhvendosen drejt territorit italian.

Kontrollet italiane janë parashikuar të jenë në fuqi të paktën deri më 15 gusht. Madridi e ka kundërshtuar argumentimin e Romës, duke e cilësuar si të pambështetur në fakte dhe duke kërkuar heqjen e masave.

Qeveria italiane, megjithatë, ka refuzuar kërkesën e Spanjës. Roma ka deklaruar se nuk pranon “ultimatume” dhe se kontrollet do të vijojnë për aq kohë sa autoritetet i konsiderojnë shqetësimet për sigurinë të pranishme.

Përplasja po vendos përballë kryeministrin spanjoll Pedro Sanchez dhe kryeministren italiane Giorgia Meloni, duke shtuar tensionet brenda Bashkimit Europian për mënyrën se si duhet menaxhuar migracioni.

Në qendër të debatit është situata në Ceuta. Javën e kaluar, dhjetëra mijëra emigrantë tentuan të hynin në enklavën spanjolle nga Maroku. Shumica e tyre u kthyen në ditët në vijim, ndërsa gjatë përpjekjeve për të kaluar kufirin raportohet se rreth 100 persona humbën jetën.

Rreth 1,400 të mitur ndodhen ende në Ceuta, përfshirë edhe fëmijë të moshave shumë të vogla. Ndërkohë, autoritetet spanjolle po monitorojnë aktivitetin në rrjetet sociale, ku janë shfaqur thirrje për një tjetër përpjekje masive për kalimin e kufirit në mesin e gushtit. Qeveria e Madridit nuk ka konfirmuar se pret një valë të re migratore, ndërsa zyra e kryeministrit Sanchez ka deklaruar se situata po ndiqet nga afër.