Vera po vjen, Himara çel sezonin e ri turistik

Himara ka çelur zyrtarisht sezonin turistik veror me një program aktivitetesh që zgjat nga 1 deri më 3 maj, i organizuar nga bashkia. Dita e parë u shoqërua me “Himara Run Fest”, një minimaratonë me nxënës përgjatë bregdetit, si dhe aktivitete sportive si volejboll plazhi e gara me kajakë. Për fëmijët u organizuan lojëra dhe argëtime të ndryshme.

Atmosferën festive e shoqëroi edhe orkestra simfonike e Forcave të Armatosura, ndërsa Muzeu Historik Kombëtar solli ekspozita, lojëra edukative dhe aktivitete për të gjitha moshat. Panairi i artizanatit dhe kulinarisë solli produkte dhe shije tradicionale të zonës.

Himara, një nga destinacionet kryesore të Rivierës shqiptare, njihet për plazhet e saj dhe trashëgiminë historike, ndërsa autoritetet lokale synojnë të promovojnë turizmin përmes aktiviteteve kulturore dhe sportive.