Ndërhyrja e policisë në zonën e Medresesë, gjatë protestës në kryeqytet, ka shkaktuar frikë dhe shqetësim edhe te banorët e zonës, mes tyre të moshuar dhe persona me probleme shëndetësore. Një prej banoreve, e tronditur nga situata e krijuar dhe përdorimi i gazit në një zonë të banuar, ka reaguar ashpër në një lidhje të drejtpërdrejtë për News24, duke dënuar veprimet e policisë dhe duke shprehur indinjatën për pasojat që, sipas saj, po përjetojnë qytetarët.
“Turp! Na terrorizojnë në lagje! Na trembën, jemi me probleme shëndeti”, u shpreh e moshuara, e cila ngriti shqetësimin për sigurinë e banorëve gjatë ndërhyrjes policore. Ajo e drejtoi mesazhin e saj edhe te autoritetet, duke paralajmëruar se dhuna ndaj të rinjve prek të gjithë shoqërinë. “Po vdiq rinia, do të vdesim dhe ne. Turp, turp!”, deklaroi ajo, duke bërë thirrje që të moshuarit dhe banorët e tjerë të mos përballen me frikë e pasiguri në lagjet ku jetojnë.
Por reagimi i saj nuk u ndal vetëm te policia. E moshuara kërkoi largimin e dy figurave kryesore të politikës shqiptare, Edi Rama dhe Sali Berisha, duke shprehur bindjen se vendi duhet t’u besohet brezave të rinj. “Të ikë Edi Rama sa më parë, të ikë Sali Berisha! Të rrojë rinia rehat, ta marrë brezi i ri këtë shtet!”, tha ajo për News24. Gjatë dëshmisë, banorja shprehu gjithashtu pakënaqësi për mënyrën se si, sipas saj, funksionojnë institucionet dhe mundësitë për punësim, duke sjellë si shembull përvojën e saj shumëvjeçare si punëtore në shtypshkronjë.
