VIDEO/ Nga toka shqiptare te tregjet globale, Rama veçon suksesin e sipërmarrjes në Krutje

Nga një sipërfaqe modeste prej vetëm një hektari në vitin 2019, në një prej sipërmarrjeve bujqësore shqiptare që sot eksporton kajsi drejt tregut italian. Ky është rrugëtimi i “ADEK FRUCHT”, Shoqërisë së Bashkëpunimit Bujqësor në Krutje të Lushnjës.

Kompania është kthyer në një shembull të zhvillimit të bujqësisë shqiptare dhe të potencialit që kanë fermerët dhe sipërmarrjet vendase për të depërtuar në tregjet europiane. Shembullin e “ADEK FRUCHT” e ka sjellë në vëmendje edhe kryeministri Edi Rama, duke e cilësuar këtë eksperiencë si dëshmi të mundësive që ofron sektori bujqësor shqiptar. Administratori i kompanisë, Armelin Meta tregon rrugëtimin dhe zhvillimin e aktivitetit, si edhe rëndësinë e mbështetjes për fermerët dhe sipërmarrjet bujqësore.

“Ne kemi nisur biznesin tonë në bujqësi në vitin 2019 me rreth 1 hektar manaferra. Më pas, filluam me kultivimin e kajsisë, të kontraktuar me kompani italiane dhe për pjesën e shitjes. Aktualisht kemi rreth 8 hektarë tokë dhe rreth 12 hektarë kajsi të kultivuara, duke shpresuar për rritjen e biznesit edhe me ndihmën e AZHBR-së për të bërë plantacionet e reja”, u shpreh ai.

Meta vlerësoi po ashtu se masa 10% e rimbursimit nga AZHBR e ka ndihmuar shumë. “Kjo ishte një masë shumë e mirë e marrë nga AZHBR-ja, kështu që shpresojmë edhe për më vonë që të kemi mbështetjen e AZHBR-së për rritjen e biznesit tonë”, u shpreh ai.