Ylli Manjani: SPAK-u është ndarë në grupe; njëri me kryeministrin dhe tjetri me ambasadoren Kim

Nga Ylli Manjani

Jam 100% i bindur se kallëzimi që gazetari bën ndaj dy prokurorëve të SPAK, është rrjedhje e qëllimshme e informacionit nga brenda.

Dyshimi im është që “klani i Yurit” brenda SPAK, denoncon “klanin e Ramës” po aty.

Se SPAK- aktualisht kështu është ndarë…

Sidoqoftë është në interes të drejtësisë kjo përplasje aty brenda.

Po dalin prova evidente që vërtetojnë katërcipërisht ato që kemi thënë për inceneratorët, se SPAK nuk ka kryer hetime të plota, por ka nxituar të bëjë arrestime show dhe ka ngritur akuza të papjekura, pa provuara dhe pa logjikë ligjore.

Dukshëm, skema ka qenë që të arrestohen e dënohen ca njerëz dhe kështu humbet vemendja dhe shpëtojnë kokat e vërteta.

Përplasja e brendshme e tregon qartë se ka ende nevojë për hetime më lart sesa Lefter Koka dhe, duhet analizuar mirë e gjithë lëvizja e parave.

Emailet e K.Z., lëvizjet e parave të koncensionarit, deklarimet e drejtoreshës së ish-ministrit, skema e evazionit me faturime fiktive dhe, lidhjet e bisnesmenëve me vendimmarrësit janë totalisht të pahetuara.

Tashmë është e qartë që ky hetim është i paplotë dhe me kosto të lartë sepse janë arrestuar e akuzuar njerëz, krejt kot. Të paktën deri më sot, kështu duket.

Zgjidhja e drejtë në këto kushte është:

1. Ngritja e një grupi të ri hetimor.
2. Bashkimi i të gjitha hetimeve për inceneratorët në një të vetme.
3. Gjykata duhet të kthejë për hetim të gjitha akuzat e papjekura që janë ngritur deri tani.
4. Lehtësim të masave të sigurisë për të arrestuarit e derisotëm.
5. Kryerje e hetimeve të gjithanshme të thella e të plota mbi çdo aspekt.
6. Pezullim i veprimtarisë tregtare dhe të pagesave për incenerim, deri në përfundim të hetimeve.

Nëse duan ta zbardhin këtë çështje, duhet të marrin këto masa dhe t’i lënë spiunllëqet kundër njëri-tjetrit nëpër gazetarë.

Ta lënë edhe Yurin edhe Ramën në punë të vet. SPAK është krijuar për të hetuar këtë të fundit, mos e harroni!

Ky duhet të jetë objektiv kyç i drejtuesit të ri të SPAK.