Lëkundje të njëpasnjëshme sizmike janë regjistruar gjatë së martës në zonën e Skiathos, duke kulmuar me një tërmet me magnitudë 4.8 ballë pas orës 16:00. Dridhja është ndjerë jo vetëm në ishull, por edhe në rajonin e Atikës, deri në Athinë.
Të dhënat paraprake nga Instituti Gjeodinamik tregojnë se epiqendra ndodhej shumë pranë ishullit, rreth 4 kilometra në drejtimin veri-veriperëndim, ndërsa thellësia e tij ishte relativisht e cekët, rreth 10 kilometra, çka shpjegon pse u ndje në një zonë më të gjerë.
Pavarësisht intensitetit të perceptuar, autoritetet greke raportojnë se nuk ka pasoja në njerëz apo dëme materiale.
Zona njihet për aktivitet sizmik dhe mbetet nën vëzhgim të vazhdueshëm. Kjo seri lëkundjesh kishte nisur më herët gjatë ditës, me një tërmet 4.7 ballë rreth orës 14:00, i pasuar nga disa pasgoditje më të vogla, duke krijuar një zinxhir aktiviteti sizmik në rajon.