Katari deklaroi të martën se ka vërejtur “përparim” në bisedimet SHBA-Iran. Doha, si ndërmjetëse kryesore, po punon pa u lodhur për t’i dhënë fund pasigurisë që rrethon krizën mes Uashingtonit dhe Teheranit. Vlerësimi u dha një ditë pasi kryeministri katarian, Sheikh Mohammed bin Abdulrahman Al Thani, u takua me presidentin amerikan Donald Trump në Shtëpinë e Bardhë.
Ky takim në Shtëpinë e Bardhë u zhvillua në një atmosferë pozitive dhe u përqendrua në arritjen e përparimit në bisedime, tha Ibrahim bin Sultan Al Hashmi, drejtor i Departamentit të Medias dhe Komunikimit në ministrinë e Jashtme. Ai foli në një konferencë javore për shtyp në Doha.
“Nuk mund të themi sa afër apo sa larg është një marrëveshje”, deklaroi Al Hashmi. Ai shtoi se përpjekjet ndërmjetësuese vazhdojnë dhe se të dyja palët po bëjnë deklarata pozitive për një zgjidhje diplomatike. Sipas tij, zyrtarët katarianë zhvilluan bisedime në Teheran dhe u konsultuan me qeveri të tjera të rajonit përpara se Sheikh Mohammed të nisej për në Uashington.
Trump tha se shtetet e Gjirit, përfshirë Katarin dhe Arabinë Saudite, i kërkuan atij të shtynte sulmet e reja. Ai deklaroi se për momentin do të priste, por do të mbante në fuqi bllokadën detare amerikane. Teherani ka propozuar rifillimin e bisedimeve brenda dy ditësh, me kusht që Uashingtoni të ndalojë sulmet, të heqë bllokadën e porteve iraniane në ngushticën e Hormuzit dhe të heqë dorë nga disa sanksione.
Negociatat për programin bërthamor iranian do të vijnë më pas. Zëdhënësi i ministrisë së Jashtme iraniane, Esmaeil Baghaei, e mbrojti propozimin të hënën. Sekretari amerikan i Shtetit, Marco Rubio, i kishte quajtur një ditë më parë disa nga kushtet e Teheranit “të skandaloze dhe qesharake”.
Al Hashmi tha se vazhdimi i mbylljes së Hormuzit do të godiste më rëndë më të dobëtit. Ai kërkoi që ngushtica, një rrugë kyçe për eksportet e naftës dhe gazit të lëngshëm të Gjirit, të rihapet sa më shpejt për lundrimin. Sheikh Mohammed iu bashkua të martën në Paris ministrave të Arabisë Saudite, Francës, Britanisë, Gjermanisë dhe Italisë për të diskutuar luftën në margjinat e një takimi të G7-s.