Britania e Madhe ka përjetuar në vitin 2025 temperaturat më të larta të regjistruara ndonjëherë, duke thyer rekordin e mëparshëm të vendosur në vitin 2022. Lajmi është konfirmuar nga Shërbimi Meteorologjik i Mbretërisë së Bashkuar (Met Office), i cili thekson se vitet e fundit po shënojnë një rritje të vazhdueshme dhe shqetësuese të temperaturave.
Sipas të dhënave zyrtare, temperatura mesatare vjetore për vitin 2025 arriti në 10.09 gradë Celsius, duke tejkaluar mesataren prej 10.03°C të vitit 2022. Ky është vetëm rasti i dytë në histori që temperatura mesatare vjetore në Britani kapërcen pragun e 10 gradëve Celsius.
Met Office bën me dije se katër nga pesë vitet e fundit renditen tashmë ndër pesë vitet më të ngrohta që nga viti 1884, një fakt që nënvizon përshpejtimin e ndryshimeve klimatike. Kreu i departamentit të klimës, Mark McCarthy, deklaroi se ngrohja globale e shkaktuar nga aktiviteti njerëzor po ndikon drejtpërdrejt në klimën e vendit.
Edhe Organizata Meteorologjike Botërore ka paralajmëruar se dhjetë vitet e fundit kanë qenë më të nxehtat e regjistruara ndonjëherë, duke rritur shqetësimet për pasojat afatgjata ndaj planetit.