Daçiç: Rezoluta 1244 dhe Republika Srpska, sukseset e Milosheviçit

Kryetari i socialistëve të Serbisë, Ivica Daçiç ka përmendur rolin e Slobodan Miloshiviçit dhe për këtë ai e ka përmendur Rezolutën 1244 të OKB-së për Kosovën si sukses e tij të madh.

Trashëgimia më e madhe e Slobodan Milosheviçit sipas tij, është pjesëmarrja e tij në krijimin e Republikës Srpska dhe “për këtë arsye Serbia ka detyrim ta ruajë RS-në”.

Kështu ka thënë kryetari i Partisë Socialiste të Serbisë në Banjallukë, në 23-vjetorin e themelimit të partisë Socialiste të Republikës Srpska.

“Për Slobodan Milosheviçin sigurisht që do të ketë mendime të ndryshme, si për të gjithë njerëzit në funksione në atë kohë, porse themelimi i Republikës Srpska dhe roli që pati në të është arritja e tij më e rëndësishme. Parti ka shumë, por është vetëm një Republika Srpska . Për këtë arsye, Serbia e ka për borxh të qëndrojë krah popullit serb dhe ta mbrojë Republikën Srpska”, ka thënë ai, njofton Veçernje Novosti.

Ai ka theksuar gjithashtu se SPS dhe SPRS formalisht nuk janë e njëjta parti, por ndërmjet tyre ka lidhje të ngushta e bashkëpunim.

Edhe pse deri vonë në parti e akuzonin se po heq dorë nga Milosheviçi, Daçiç, kohëve të fundit, gjithnjë e më shpesh po thirret në trashëgiminë e ish-kryetarit të Serbisë.

Krahas meritës që ia njeh për Marrëveshjen e Dejtonit, ai për meritë ia numëron edhe miratimin e Rezolutës 1244 OKB-së, me të cilën, sipas medieve të Beogradit, Kosova konsiderohet pjesë e Serbisë.