Dënohet nga OKB, gati sanksionet për Korenë e Veriut

Në një mbledhje urgjente me dyer të mbyllura të mbajtur vetëm pak orë pas testimit të një bombe bërthamore nga Koreja e Veriut, anëtarët e Këshillit të Sigurimit pranë Organizatës së Kombeve të Bashkuara kanë rënë dakord për të shtuar sanksionet ndaj Penianit.

Të 15 anëtarët e një prej institucioneve kryesore të OKB-së lëshuan kritika të ashpra për këtë veprim, përfshirë përfaqësuesit e Kinës, Shteteve të Bashkuara dhe Francës.

Në fjalën e saj, ambasadorja amerikane, Samantha Power, u shpreh se Koreja e Veriut po përpiqet që të perfeksionohet në prodhimin e armëve nukleare dhe në pajisjet lançuese në mënyrë që të marrë peng rajonin dhe botën nën kërcënimin e një sulmi.

Ajo shtoi se OKB nuk duhet të qëndrojë indiferente ndaj kësaj situate dhe se sanksionet ndaj Penianit duhet të ashpërsohen.

Nga ana tjetër, përfaqësuesi i Francës, Fransua Delatre, nënvizoi se Koreja e Veriut, duhet të mbajë përgjegjësi për veprimet e saj, të cilat janë një shkelje e hapur e së drejtës ndërkombëtare dhe për më tepër për sjelljen e papërgjegjshme.

Në mbyllje, ai u shpreh se në këto kushte sanksionet janë të paevitueshme. Koresë së Veriut i janë vendosur për herë të parë sanksionet në vitin 2006, kur shteti diktatorial kreu edhe testin e parë bërthamor.

Përgjatë muajve të fundit Peniani ka testuar armë të ndryshme përfshirë rraketat balistike me rreze të gjatë e të mesme. Megjithatë, gjithçka kulmoi me testin e rradhës bërthamor, i cili shkaktoi edhe një tërmet me magnitudë 5.3 ballë.