Erdoğan ashpërson tonet ndaj Greqisë: Çmilitarizoni ishujt e Egjeut, mos e ngatërroni qetësinë me dobësinë

Presidenti turk Recep Tayyip Erdogan i kërkoi Greqisë të “ndryshojë kursin” dhe t’i japë fund militarizimit të ishujve të Egjeut me status të çmilitarizuar. “Turqia nuk ka ambicie në lidhje me territorin e askujt, por nuk do të lejojë askënd të shkelë të drejtat e saj”, deklaroi Erdogan.

Ai paralajmëroi Athinën se “kushdo që e interpreton qasjen e qetë dhe racionale të Turqisë si dobësi, po bën një gabim të rëndë”, duke i bërë thirrje Greqisë të respektojë traktatet ndërkombëtare. Erdogan tha se Ankaraja ka ndjekur një qasje konstruktive në marrëdhëniet me Greqinë, por se “shumicën e kohës nuk kemi parë një përgjigje reciproke ndaj qëllimeve tona të mira”.

Ndërkohë, Greqia kundërshton interpretimin turk të traktateve, duke argumentuar se ato nuk imponojnë një regjim të përgjithshëm çmilitarizimi dhe se Athina ka të drejtë të mbrojë territorin e saj.

Erdogan deklaroi gjithashtu se Turqia po shqyrton forcimin e marrëdhënieve me Organizatën e Bashkëpunimit të Shangait, duke theksuar se kjo “nuk nënkupton një shkëputje nga ndonjë bllok tjetër apo nga Perëndimi”.