Erdogan: Asnjë parti nuk qeveris e vetme

Presidenti turk, Rexhep Taip Erdogan tha se rezultati i zgjedhjeve nënkupton se asnjë parti nuk qeveris e vetme.

Ai u bëri thirrje të gjitha partive që të bëjnë një vlerësim të shëndetshëm dhe realist të rezultateve.

Lajmi për zgjedhjet në Turqi ka pushtuar kryetitujt e mediave ndërkombëtare.

Partia e Presidentit Rexhep Taip Erdogan, jo vetëm që nuk fitoi shumicën që i duhej atij për të bërë ndryshime kushtetuese, por është përballë sfidës për të formuar qeverinë pasi humbi shumicën për herë të parë në 13 vite.

Partia e tij mori 41 përqind të votave, një rënie e fortë në krahasim me vitin 2011.

Guardian shkruan se vendi rrezikon të shkojë në zgjedhje të parakohshme.

Një tjetër lajm nga këto zgjedhje ishte që partia pro-kurde HDP kaloi pragun e 10 përqind, duke siguruar vende në parlament për herë të parë.

“Është një natë karnavalesh. Ne nuk i besojmë më AKP-së,” tha një 47- vjeçar për AFP-në.

Lira turke ra ndjeshëm në bursë të hënën, ndërsa aksionet e Bursës së Stambollit u ulën me 8 përqind mëngjesin pas zgjedhjeve.

Sipas BBC, rezultati është një goditje e rëndë për presidentin Erdogan dhe planet e tij për të fuqizuar pushtetin e kreut të shtetit.

Ai erdhi në pushtet në vitin 2003 si kryeministër dhe kërkonte një shumicë prej dy të tretash për të kthyer Turqinë në një republikë presidenciale.