Kina kryen stërvitje ushtarake masive pranë Tajvanit

Kina ka nisur stërvitje ushtarake me zjarr të vërtetë rreth Tajvanit, duke simuluar bllokimin e porteve kryesore, sulmin ndaj objektivave detare dhe zmbrapsjen e “ndërhyrjeve” ndërkombëtare.

Këto stërvitje, të quajtura “Misioni i Drejtësisë 2025”, shërbejnë si një paralajmërim i ashpër ndaj forcave “separatiste” të Tajvanit dhe ndërhyrjeve të jashtme, sipas një zëdhënësi të Komandës Lindore të PLA-së. Ushtria Çlirimtare Popullore (PLA) dërgoi forca detare, ajrore dhe raketore për të rrethuar ishullin, ndërsa anijet e rojës bregdetare kineze kryen “inspektime të zbatimit të ligjit” rreth ishujve të jashtëm të Tajvanit.

Pekini e konsideron këtë një veprim legjitim dhe të domosdoshëm për të ruajtur sovranitetin dhe unitetin kombëtar të Kinës.

Ministria e Mbrojtjes e Tajvanit dënoi ashpër aktivitetin, duke akuzuar Pekinin për përshkallëzim të tensioneve dhe minim të paqes rajonale. Roja bregdetare e Tajvanit shtoi se shtrirja e stërvitjeve përbën një kërcënim të rëndësishëm për sigurinë e lundrimit dhe të drejtat operacionale të peshkatarëve në ujërat e saj.

Këto stërvitje, të parat e PLA-së që synojnë Tajvanin që nga prilli, vijnë pas javësh tensionesh me Japoninë, pasi kryeministrja e saj, Sanae Takaichi, sugjeroi përfshirje ushtarake në rast sulmi kinez. Ato pasojnë gjithashtu miratimin e qeverisë amerikane për shitjen e armëve prej 11 miliardë dollarësh Tajvanit dhe deklaratat e fundit të presidentit të Tajvanit, Lai Ching-te, për të forcuar mbrojtjen dhe arritur “një nivel të lartë gatishmërie luftarake” deri në vitin 2027. Komanda Lindore e Kinës deklaroi se stërvitjet testojnë aftësitë e trupave për manovra të shpejta, formimin e një qëndrimi gjithëpërfshirës dhe ekzekutimin e bllokadës dhe kontrollit sistematik. Analistët vunë në dukje se zonat e caktuara ishin më të mëdha dhe më afër ishullit kryesor të Tajvanit se zakonisht, dhe se ishte hera e parë që PLA deklaroi shprehimisht se po praktikonte pengimin e përfshirjes ndërkombëtare.

Kina e njeh si tokë e saj. Pekini po bën të gjitha përpjekjet paqësore që ta marrë ishullin e Tajvanit. Ndërkohë që SHBA po synon të marr Groenlandën edhe me forcë ushtarake, nga ana e saj Kina akoma nuk po shqyrton forcën ushtarake për një ishull pronë të shtetit kinez.