Kryediplomati francez: Askush nuk mund të mohojë krimet e regjimit sirian

Deklarata e ministrit francez, Ayrault u bë pas takimit të realizuar mbrëmë vonë në Paris me sekretarin e Përgjithshëm të Kombeve të Bashkuara, Ban Ki-moon

Ministri i Jashtëm i Francës, Jean-Marc Ayrault, ka folur të premten rreth përdorimit të armëve kimike në Siri, ku ka deklaruar se askush nuk mund të mohojë krimet e kryera nga regjimi sirian, raporton Anadolu Agency (AA).

“Askush nuk mund të mohojë krimet që ka bërë qeveria siriane. Ata që kryejnë krime do të duhet të përgjigjen”, deklaroi kryediplomati francez, Ayrault, pas takimit të realizuar mbrëmë vonë në Paris me sekretarin e Përgjithshëm të Kombeve të Bashkuara, Ban Ki-moon.

“Është e pamundur të mohohet se përdorimi i armëve kimike nga ana e regjimit sirian paraqet shkelje të së drejtës ndërkombëtare që njëherësh paraqet detyrim që del nga marrëveshja për paqe”, tha Ayrault.

Ndërkohë, numri i të vdekurve nga sulmet ajrore të së premtes në Halep ka shkuar në mbi 40, ndërsa i të plagosurve në 107.