Kryeministri i Turqisë shpëton burrin që donte të hidhej nga “Ura e Bosforit”

Një burrë që po tentonte të hidhej nga Ura e Bosforit në Turqi ka ndërruar mendje pas ardhjes së kryeministrit të vendit në vendngjarje.

Kryeministri Binali Yıldırım, ka qenë duke kaluar tek Ura “Dëshmorët e 15 Korrikut”, e njohur ndryshe Ura e Bosforit kur ka parë se dikush po mundohej të vetëvritej.

Burri  me inicialet T.T pas përpjekjeve nga punonjësit shoqërues të autokolonës ka hequr dorë nga vetëvrasja pasi ka  parë edhe kryeministrin Yıldırım.

Pasi e ka qetësuar qytetarin, kryeministri Yıldırım i ka dhënë ujë dhe duke e kapur për dore kanë udhëtuar bashkë në automjetin e tij, për në qendrën e kongreseve Haliç, për të marrë pjesë në ceremoninë martesore të vajzës së ministrit të Kulturës dhe Turizmit, Numan Kurtulmuş, raporton Anadolu Agency (AA).

Yıldırım i është drejtuar qytetarit:

Një veprim të tillë nuk duhet ta ndërmarrësh më. Ne jemi myslimanë, dhe asnjë gjë nuk mund të jetë arsye që një njeri t’i japë jetës së tij fund….Në fund të çdo errësire ka një dritë, pas çdo situate të vështirë ka një lehtësim…”