Mashtruesit po merrnin 100 mijë euro për Taulant Ballën, arrestohen

Edison Korra, 24 vjeç, dhe Orest Balla, 23 vjeç, u arrestuan sot gjatë një operacioni policor. Ata dyshohen se tentuan t’i merrnin 100 mijë euro Armand Dukës, duke u paraqitur në komunikimet online si kreu i grupit parlamentar të PS-së, Taulant Balla. Policia i arrestoi në momentin kur po merrnin paratë.

Sipas raportimeve mediatike, hetuesit dyshojnë se pas skemës mund të qëndrojë Florian Gjergji. Policia nuk e ka konfirmuar publikisht përfshirjen e tij në këtë rast; hetimet vijojnë për të përcaktuar rolin e çdo personi.

Denoncimi në polici është bërë nga vetë Duka, i cili ka dyshuar se kishte rënë pre e mashtrimit. Mesazhi i mbërritur në celularin e tij nga dy të arrestuarit thuhej se duke u prezantuar si Taulant Balla, duhej që Duka të dërgonte shumën e parave tek adresa që ia kishin dhënë dy të rinjë, duke u hequr si të njohur të Ballës.

Pas arrestimit, ata nuk kanë pranuar të japin deklarime të hollësishme për policinë se kush fshihet pas tyre.

Ndërkohë, gjatë komunikimit mësohet nga mediat se Duka i ka thënë që “lidhuni me djalin tim, sepse nuk marr vesh nga këto gjëra për kriptomonedha”.

Në telefon dy të arrestuarve i ka dalë një nga agjentët e policisë duke u prezantuar si djali i Dukës. Agjenti i infiltruar u ka thënë dy autorëve se nuk i ka paratë në kriptovalutë, por do ia sjellë cash. Në momentin që do dorëzoheshin paratë, janë bërë arrestimet.

Në kuadër të operacionit të koduar “Seen”, u vunë në pranga Edison Korra, 24 vjeç dhe Orest Balla, 23 vjeç.

Njoftimi i policisë:

Finalizohet operacioni i koduar “Seen”. Goditet një tjetër tentativë për të përfituar shuma të mëdha parash, nëpërmjet mashtrimit në platforma komunikimi online.

Mashtruan një 64-vjeçar, nëpërmjet një profili të rremë me kredencialet e një të njohuri të tij, për t’i marrë 100 000 euro, arrestohen në flagrancë, kur po merrnin paratë, 2 shtetas.

Specialistët e Seksionit për Hetimin e Krimeve Ekonomiko-Financiare, në bashkëpunim me Forcën e Posaçme “Operacionale”, si rezultat i administrimit të menjëhershëm të kallëzimit të një 64-vjeçari, mbi dyshime për mashtrim në platformë komunikimi online, finalizuan operacionin e koduar “Seen”, gjatë të cilit u kapën në flagrancë, kur po i merrnin 100 000 euro kallëzuesit, dhe u vunë në pranga shtetasit E. K., 24 vjeç dhe O. B., 23 vjeç.

Nga hetimet e kryera me metoda speciale, me qëllim zbardhjen e plotë të autorësisë dhe rrethanave të këtij rasti, dyshohet se këta shtetas kanë komunikuar me 64-vjeçarin, nëpërmjet një profili të rremë në një rrjet social.

Profili ishte aktivizuar me të dhënat e një të njohuri të 64-vjeçarit, me qëllim mashtrimin e tij.

Hetimet vijojnë me qëllim identifikimin dhe nxjerrjen përpara përgjegjësisë penale të shtetasve të tjerë që mund të jenë përfshirë në këtë rast.

Materialet procedurale iu referuan Prokurorisë, për veprime të mëtejshme.