Rrëfimi tronditës i mbesës së Kennedyt: Diagnostikimi me kancer pas lindjes së vajzës

Tatiana Schlossberg, mbesa 35-vjeçare e ish-presidentit John F. Kennedy, ka bërë të ditur se është diagnostikuar me kancer terminal, me një prognozë mjekësore që i jep më pak se një vit jetë. Në një ese të botuar në “The New Yorker”, ajo shkroi se diagnoza erdhi vitin e kaluar, menjëherë pasi lindi vajzën e saj në maj 2024. Ajo vuan nga leuçemia akute mieloide (AML) me një mutacion të rrallë gjenetik të njohur si Inversioni 3, i cili gjendet në më pak se 2% të rasteve të kësaj sëmundjeje.

Schlossberg shprehu tronditjen e saj për lajmin, duke theksuar se ndihej plotësisht e shëndetshme dhe aktive deri në atë moment. “Nuk mund ta besoja se po flisnin për mua,” shkroi ajo. Gjatë betejës së saj, ajo i është nënshtruar një trajtimi të mundimshëm që ka përfshirë raunde të shumta kimioterapie, dy transplante të palcës kockore dhe pjesëmarrje në dy prova klinike. Gjendja e saj u komplikua më tej nga një formë e virusit Epstein-Barr, i cili i dëmtoi veshkat dhe e detyroi të mësonte të ecte sërish.

Si gazetare mjedisore dhe nënë e dy fëmijëve të vegjël, një djali 3 vjeç dhe një vajze 1 vjeçe, Schlossberg ka marrë mbështetje të madhe nga familja e saj e ngushtë. Ajo përmendi se vëllezërit e motrat, Rose dhe Jack, e kanë ndihmuar vazhdimisht me kujdesin për fëmijët dhe i kanë qëndruar pranë. Në të njëjtën ese, ajo kritikoi kushëririn e saj, Robert F. Kennedy Jr., kandidimi presidencial i të cilit u cilësua si një “turp” për familjen.

Në fund, Schlossberg shprehu dhimbjen e thellë për shtimin e një tjetër tragjedie në historinë e familjes së saj, e cila është shënuar nga vrasjet e gjyshit të saj, JFK, dhe xhaxhait të madh, Robert F. Kennedy. “Gjatë gjithë jetës sime, jam përpjekur të jem e mirë… dhe ta mbroj nënën time dhe të mos e bëj kurrë të mërzitet,” shkroi ajo. “Tani i kam shtuar një tragjedi të re jetës së saj… dhe nuk ka asgjë që mund të bëj për ta ndaluar atë.”