Një fluturim nga Dubai drejt Tel Avivit u devijua papritur drejt Arabisë Saudite pas një sherri mes pilotëve, thanë zyrtarë izraelitë për mediat lokale.
Avioni i kompanisë Flydubai, i cili u nis nga Aeroporti Ndërkombëtar i Dubait në Emiratet e Bashkuara Arabe herët të mërkurën, sinjalizoi një kod emergjence rreth dy orë pas nisjes, sipas faqes së gjurmimit të fluturimeve Flightradar24, përcjell A2 CNN. Pak minuta më vonë, avioni kaloi në kodin që përdoret për të raportuar një rrëmbim, por më pas u rikthye në sinjalin e përgjithshëm të emergjencës, bëri të ditur Flightradar24.
Zyra e kryeministrit izraelit tha se incidenti nuk besohet të ketë qenë një rrëmbim avioni. Pasagjerët i thanë mediave lokale se kishin frikë për jetën e tyre, pasi avioni filloi të humbiste lartësi gjatë incidentit.
Sipas mediave lokale, duke iu referuar zyrtarëve izraelitë të mbrojtjes, sinjali i emergjencës dyshohet se u aktivizua pas një konflikti fizik mes pilotit dhe bashkëpilotit.
Fluturimi FZ1073, me rreth 150 persona në bord, shumica e të cilëve ishin izraelitë, ishte planifikuar të ulej në Aeroportin Ben Gurion, por në vend të kësaj u ul në Aeroportin e Tabukut, në verilindje të Arabisë Saudite.
Një zëdhënës i Flydubai konfirmoi se fluturimi “përjetoi një incident gjatë rrugës” dhe tha se do të publikohen përditësime të mëtejshme, ndërsa detajet do të bëhen të qarta. “Ekipet tona po bashkëpunojnë ngushtë me autoritetet përkatëse”, shtoi ai.
Forcat Ajrore izraelite dërguan avionë luftarakë në përgjigje të incidentit, ndërsa kryeministri Benjamin Netanyahu zhvilloi konsultime urgjente lidhur me ngjarjen, edhe për faktin se shtetasit izraelitë janë ulur në një vend që nuk e njeh shtetin e tyre.