Turqia: Nuk do të marrim parasysh thirrjen e SHBA për Iranin

Turqia nuk do të marrë parasysh thirrjen e Departamentit amerikan të Shtetit për të ndaluar importimin e naftës së papërpunuar iraniane deri më 4 nëntor, kur sanksionet e fundit do të fillojnë.

“Vendimet e marra nga Shtetet e Bashkuara për këtë çështje nuk janë të detyrueshme për ne. Natyrisht, ne do të ndjekim Kombet e Bashkuara në vendimin e saj. Përveç kësaj, ne do të ndjekim vetëm interesat tona kombëtare”, tha ministri i Ekonomisë i Turqisë, Nihat Zeybekci, cituar nga Hurriyet.

Ai shtoi se “miku ynë, Irani nuk do të ballafaqohet me ndonjë veprim të padrejtë”.

Departamenti i Shtetit më parë këtë javë i bëri thirrje të gjithë aleatëve amerikanë që të ndalojnë plotësisht blerjen e naftës iraniane.

Në të njëjtën kohë, importuesit e naftës duke përfshirë Japoninë, Korenë e Jugut dhe Indinë, si dhe vendet evropiane kanë thënë se do të vazhdojnë blerjen e naftës iraniane.

Marrëveshja bërthamore, të cilën Irani nënshkroi me SHBA, Francë, Gjermani, Mbretërinë e Bashkuar, Rusinë dhe Kinën, solli fundin e sanksioneve ndërkombëtare ndaj Iranit, duke i dhënë qasje në tregjet ndërkombëtare, veçanërisht në ato të naftës.

Megjithatë, nëse sanksionet e SHBA çojnë në mbylljen e këtij aksesi, Irani do të jetë i izoluar nga çdo lloj përfitimi ekonomik nga marrëveshja bërthamore.