Vrasësi i Dallasit planifikonte sulm më të madh

Personi që vrau pesë oficerë policie në Dallas dhe plagosi 7 të tjerë, po planifikonte një sulm edhe më të madh. Kështu deklaroi shefi i Policisë së qytetit teksan, David Brown, i cili deklaroi se policia është e bindur që agresori kishte plane të tjera më serioze.

Micah Johnson, 25 vjeç, gjatë përballjes me policinë i tha negociatorëve se ishte zemëruar për vrasjet e njerëzve me ngjyrë nga policia dhe se donte që të vriste oficerë të bardhë. Në një deklaratë për mediat, shefi i policisë tha se hetimet kanë treguar që Johnson kishte bërë praktikë me eksplozivë. Ai gjithashtu shtoi se hetuesit po përpiqen që të gjejnë kuptimin e inicialeve RB, të cilat vrasësi i shkroi me gjakun e tij pranë vendit ku u vra nga një bombë e policisë.

Policia po përpiqet të deshifrojë edhe ditarin e gjetur në shtëpinë e Johnson, por mësohet se kjo është e vështirë. Johnson sulmoi në befasi forcat e rendit gjatë një proteste në Dallas kundër vrasjes së njerëzve me ngjyrë nga policia. Micah Johnson, një ushtar në rezervë që kishte shërbyer më parë në Afganistan, shfrytëzoi përgatitjen e tij ushtarake për të zënë në kurth oficerët e policisë.

Ky ishte sulmi më vdekjeprurës ndaj policisë amerikane që prej sulmeve terroriste të 11 shtatorit 2001.