Zbulohet plani sekret amerikan për kapjen e Presidentit venezuelian. U dhanë 50 milionë dollarë për informacione!

Për muaj të tërë, spiunët amerikanë kishin monitoruar çdo lëvizje të presidentit të Venezuelës, Nicolas Maduro.

Një ekip i vogël, që përfshinte edhe një burim brenda qeverisë venezueliane, kishte vëzhguar se ku flinte 63-vjeçari, çfarë hante, çfarë vishte dhe madje, sipas zyrtarëve të lartë ushtarakë, survejoheshin edhe “kafshët e tij shtëpiake”.

Më pas, në fillim të dhjetorit, u finalizua një mision i planifikuar, i quajtur “Operacioni Vendosmëria Absolute”. Ai ishte rezultat i muajve të planifikimit të imtësishëm dhe stërvitjeve, të cilat përfshinin edhe krijimin nga trupat elitare amerikane të një kopjeje të saktë, në përmasa reale, të shtëpisë së sigurt të Maduros në Karakas, për të praktikuar rrugët e hyrjes.

Plani – që përbënte një ndërhyrje të jashtëzakonshme ushtarake amerikane në Amerikën Latine, të paparë që nga Lufta e Ftohtë – u mbajt në fshehtësi të plotë. Kongresi nuk u informua dhe as u konsultua paraprakisht. Me detajet e sakta të përcaktuara, zyrtarëve të lartë ushtarakë u mbetej vetëm të prisnin kushtet optimale për nisjen e operacionit.

Ata donin të maksimizonin elementin e befasisë, thanë zyrtarët të shtunën. Kishte pasur një nisje të rreme katër ditë më herët, kur presidenti Trump kishte dhënë miratimin, por u vendos të pritej për kushte më të mira moti dhe më pak mbulesë resh.

“Gjatë javëve të Krishtlindjes dhe Vitit të Ri, burrat dhe gratë e ushtrisë së Shteteve të Bashkuara qëndruan gati, duke pritur me durim që të plotësoheshin kushtet e duhura dhe që presidenti të na urdhëronte të vepronim”, tha gjenerali Dan Caine, oficeri më i lartë ushtarak i vendit, në një konferencë për shtyp të shtunën në mëngjes.

“Fat të mbarë dhe Zoti ju ndihmoftë”

Urdhri nga presidenti për të nisur misionin erdhi më në fund në orën 22:46 sipas orës lindore (EDT) të premten.

“Do ta bënim këtë katër ditë më parë, tre ditë më parë, dy ditë më parë, dhe pastaj papritur u hap mundësia. Dhe ne thamë: Shkoni”, i tha vetë Trump emisionit Fox & Friends të shtunën, disa orë pas operacionit të natës.

“Ai na tha, dhe ne e vlerësojmë… fat të mbarë dhe Zoti ju ndihmoftë”, tha gjenerali Caine.

Urdhri i Trump erdhi pak para mesnatës në Karakas, duke i dhënë ushtrisë pjesën më të madhe të natës për të operuar në errësirë.

Ajo që pasoi ishte një mision prej dy orësh e njëzet minutash nga ajri, toka dhe deti, që tronditi shumë njerëz në Uashington dhe në mbarë botën. Për nga përmasa dhe saktësia, ishte pothuajse i paprecedentë. Ai nxiti dënime të menjëhershme nga disa fuqi rajonale, me presidentin e Brazilit, Lula da Silva, që tha se kapja e dhunshme e udhëheqësit të Venezuelës krijoi “edhe një precedent tjetër jashtëzakonisht të rrezikshëm për të gjithë komunitetin ndërkombëtar”.

Trump nuk e ndoqi misionin nga dhoma e situatave në Shtëpinë e Bardhë. Në vend të kësaj, ai ishte i rrethuar nga këshilltarët e tij në klubin e tij Mar-a-Lago në Palm Beach, Florida, ku pa një transmetim të drejtpërdrejtë të operacionit, pranë drejtorit të CIA-s, John Ratcliffe, dhe sekretarit të Shtetit, Marco Rubio.

“Ishte diçka e jashtëzakonshme për t’u parë”, tha Trump të shtunën. “Nëse do ta kishit parë çfarë ndodhi… unë e shikoja fjalë për fjalë sikur po shikoja një emision televiziv. Dhe nëse do të kishit parë shpejtësinë, dhunën… ishte thjesht e mahnitshme, një punë e jashtëzakonshme që bënë këta njerëz.”

Muajt e fundit, mijëra trupa amerikane janë dislokuar në rajon, duke iu bashkuar një aeroplanmbajtëseje dhe dhjetëra anijeve luftarake në grumbullimin më të madh ushtarak të dekadave të fundit, ndërsa presidenti Trump ka akuzuar Maduron për trafik droge dhe narko-terrorizëm, si dhe ka shkatërruar dhjetëra varka të vogla të dyshuara se transportonin drogë nëpër rajon.

Por shenjat e para të Operacionit Vendosmëria Absolute u panë në qiell. Më shumë se 150 avionë – përfshirë bombardues, avionë luftarakë dhe avionë zbulimi – u angazhuan gjatë natës, sipas zyrtarëve amerikanë.

“Ishte shumë komplekse, jashtëzakonisht komplekse, gjithë manovra, uljet, numri i avionëve”, i tha Trump Fox News. “Kishim një avion luftarak për çdo situatë të mundshme.”

Shpërthime të forta u dëgjuan në Karakas rreth orës 02:00 sipas orës lokale, dhe shtullunga tymi u panë duke u ngritur mbi qytet.

“Dëgjova një zhurmë të madhe, një shpërthim të fortë”, i tha gazetarja Ana Vanessa Herrero BBC-së. “U tundën të gjitha dritaret. Menjëherë pas kësaj pashë një re të madhe tymi që pothuajse bllokoi gjithë pamjen.”

“Avionë dhe helikopterë po fluturonin kudo mbi qytet”, tha ajo.

Së shpejti, video që tregonin avionë të shumtë në qiell – dhe të tjera që tregonin pasojat e dukshme të shpërthimeve – filluan të qarkullonin gjerësisht në rrjetet sociale. Njëra tregonte një kolonë helikopterësh që fluturonin në lartësi të ulët mbi Karakas, ndërsa tymi ngrihej nga shpërthime të dukshme.

“U zgjuam rreth orës 01:55 nga zhurma e shpërthimeve dhe gumëzhima e avionëve që fluturonin mbi Karakas”, i tha BBC-së një dëshmitare, Daniela. “Gjithçka u zhyt në errësirë të plotë, e ndriçuar vetëm nga flakërimet e shpërthimeve aty pranë.”

“Fqinjët po dërgonin mesazhe në grupin chat e pallatit, të gjithë të hutuar dhe të pavetëdijshëm për atë që po ndodhte [dhe] të frikësuar nga shpërthimet”, tha ajo.

BBC ka shqyrtuar një numër videosh që tregojnë shpërthime, zjarr dhe tym në zona të ndryshme rreth Karakasit për të identifikuar saktësisht cilat objekte u goditën.

Deri tani, janë konfirmuar pesë lokacione, përfshirë Bazën Ajrore Generalissimo Francisco de Miranda, një pistë ajrore e njohur si La Carlota dhe portin La Guaira, kanali kryesor i Karakasit drejt Detit Karaibe.

Disa nga sulmet amerikane kishin në shënjestër sistemet e mbrojtjes ajrore dhe objektiva të tjera ushtarake, thanë zyrtarët. Trump gjithashtu sugjeroi se SHBA-të kishin ndërprerë energjinë elektrike në Karakas përpara nisjes së misionit, megjithëse nuk specifikoi se si.

“Dritat e Karakasit u fikën kryesisht falë një ekspertize të caktuar që ne kemi”, tha ai. “Ishte errësirë dhe ishte vdekjeprurëse.”

“Ata e dinin se po vinim”

Ndërsa goditjet shpërthenin rreth Karakasit, forcat amerikane hynë në qytet. Ato përfshinin anëtarë të njësisë elitare Delta Force, njësia më e lartë e misioneve speciale të ushtrisë amerikane, sipas burimeve që i thanë partnerit amerikan të BBC-së, CBS. Ata ishin të armatosur rëndë – dhe mbanin edhe një pishtar prerës në rast se do t’u duhej të prisnin dyert metalike të shtëpisë së sigurt të Maduros.

Trupat mbërritën në vendndodhjen e Maduros pak pasi nisën sulmet, në orën 02:01 sipas orës lokale, sipas gjeneralit Caine. Trump e përshkroi shtëpinë e sigurt si një “fortesë” ushtarake të fortifikuar rëndë në zemër të Karakasit.

“Ata ishin në pozicion pritjeje për ne. E dinin se po vinim”, tha ai.

Trupat u përballën me zjarr sapo mbërritën, dhe një nga helikopterët amerikanë u godit, por arriti të vazhdonte fluturimin.

“Forca e kapjes zbriti në kompleksin e Maduros dhe veproi me shpejtësi, saktësi dhe disiplinë”, tha gjenerali Caine.

“Ata thjesht hynë me forcë dhe depërtuan në vende që realisht nuk ishin menduar të thyheshin, e dini, dyer çeliku të vendosura aty pikërisht për këtë arsye”, tha Trump.

Vetëm teksa operacioni – që përfshinte edhe kapjen e bashkëshortes së Maduros, Cilia Flores – ishte duke u zhvilluar, sekretari i Shtetit Rubio filloi të njoftonte ligjvënësit për veprimin, një vendim që më pas ka shkaktuar zemërim te disa anëtarë të Kongresit.

“Ta bëjmë të qartë: Nicolas Maduro është një diktator i paligjshëm. Por nisja e veprimeve ushtarake pa autorizim të Kongresit dhe pa një plan të besueshëm për atë që vjen më pas është e pamatur”, tha demokrati kryesor Chuck Schumer, udhëheqësi i partisë në Senat.

Njoftimi paraprak i Kongresit do ta kishte rrezikuar misionin, u tha Rubio gazetarëve gjatë konferencës për shtyp të shtunën.

“Kongresi ka prirje të nxjerrë informacione”, shtoi Trump. “Kjo nuk do të ishte gjë e mirë.”

Në kompleksin e Maduros, ndërsa trupat elitare amerikane po vërshonin brenda, Trump tha se presidenti venezuelian – i cili raportohet se muajt e fundit ka rritur varësinë nga truprojat kubane – u përpoq të ikte drejt një dhome të sigurt.

“Ai po përpiqej të shkonte në një vend të sigurt, që nuk ishte i sigurt, sepse ne do ta kishim hedhur në erë derën për rreth 47 sekonda”, tha ai.

“Ai arriti te dera. Nuk arriti ta mbyllte”, tha Trump. “U sulmua aq shpejt sa nuk arriti të hynte në atë [dhomë].”

Kur u pyet nëse SHBA-të mund ta kishin vrarë Maduron, udhëheqësin autoritar që mori presidencën në vitin 2013, nëse ai do t’i kishte rezistuar arrestimit, Trump tha: “Mund të kishte ndodhur.”

Nga ana amerikane, “disa djem u goditën”, tha ai, por asnjë pjesëtar i ushtrisë amerikane nuk u vra. Autoritetet venezueliane nuk kanë konfirmuar viktima.

SHBA-të kishin ofruar më parë një shpërblim prej 50 milionë dollarësh për informacion që do të çonte në arrestimin e Maduros. Por deri në orën 04:20 sipas orës lokale të së shtunës, helikopterët po largoheshin nga territori venezuelian me Maduron dhe bashkëshorten e tij në bord, në paraburgim të Departamentit të Drejtësisë dhe në rrugë drejt Nju Jorkut, ku pritet të përballen me akuza penale.

Pothuajse saktësisht një orë më vonë, Trump njoftoi botën për kapjen e tij.

“Maduro dhe gruaja e tij së shpejti do të përballen me gjithë fuqinë e drejtësisë amerikane”, tha ai.