Zelensky nderohet me çmimin “Charlemagne”

Çmimi “Charlemagne” i këtij viti do t’i jepet presidentit ukrainas Volodymyr Zelensky më 14 maj, megjithëse nuk është e qartë nëse ai do ta pranojë çmimin personalisht.

Kjo gjë është bërë e ditur nga bordi i drejtorëve të çmimit, ku thonë se Zelensky nuk po mbronte vetëm sovranitetin e Ukrainës dhe jetën e qytetarëve të saj, por edhe Evropën dhe vlerat evropiane.

“Populli ukrainas, nën udhëheqjen e presidentit të tyre Volodymyr Zelenskyy, nuk po mbron vetëm sovranitetin e vendit dhe jetën e qytetarëve të tij, por edhe Evropën dhe vlerat evropiane”, thuhet në deklaratë.

Çmimi Ndërkombëtar “Charlemagne” i Aachen-it jepet për punën e bërë në shërbim të Bashkimit Evropian. Ndërkohë presidentja e Komisionit Evropian Ursula von der Leyen do të mbajë një fjalim për nder të tij.

Zelensky ka pranuar çmimin në emër të popullit ukrainas, por ende nuk është e qartë nëse ai do të marrë pjesë personalisht në ceremoni apo përmes një lidhjeje video.

Fituesit e mëparshëm të çmimit përfshijnë ish-kancelaren gjermane Angela Merkel, ish-kryeministrin britanik Tony Blair, presidentin francez Emmanuel Macron dhe ish-presidentin amerikan Bill Clinton.