Zv.presidentja Kamala Harris caktohet për të adresuar krizën humanitare në SHBA

Me ardhjen e demokratëve në pushtet, është rritur numri i emigrantëve që synojnë Amerikën për një jetë më të mirë.

Në muajin shkurt, autoritetet pritën mbi 100 mijë persona në kufirin jugor të SHBA-së.

Janë me qindra minorenët që po mbahen në godina të posaçme, të ndarë nga familja dhe shpesh në shkelje të rregullave të pandemisë.

Të mërkurën, presidenti Joe Biden caktoi zëvendësen e tij, Kamala Harris, të bëjë përpjekje për të adresuar krizën humanitare, në koordinim me shtetet e origjinës.

“Kur problemet i zgjidh brenda kufijve të shteteve, nga kjo përfitojnë të gjithë, edhe ekonomitë e tyre. Fatkeqësisht, administrata e vjetër veproi duke i bllokuar mbi 700 milionë dollarë fonde Hondurasit, Guatemalës, El-Salvadorit. Ai program do të aktivizohet sërish,” tha Joe Biden.

Republikanët akuzojnë Biden se po inkurajon emigracionin e paligjshëm dhe po e rëndon krizën në kufirin me Meksikën.

Senatori i Teksasit, Ted Cruz, tha se edhe mediet proqeveritare nuk po i kushtojnë vëmendje krizës.

“Shumë nga këta fëmijë emigrantësh po abuzohen fizikisht, seksualisht nëpër qendra. Dhe janë politikat e Joe Biden  shkaktare të këtij abuzimi. Kjo tragjedi njerëzore po shkaktohet prej Biden,” tha Cruz.

Ish-presidenti republikan, Donald Trump mbajti një pozicion më të ashpër kundrejt të huajve pa dokumente gjatë mandatit të vet, ndërsa plani i tij për të përforcuar murin kufitar me Meksikën, u ndërpre pas ardhjes së demokratëve.