Aktivisti Dritan Goxhaj, i ftuar në emisionin “Koha Jonë-Debat” me Nikoll Lesin, deklaroi se dorëheqja e kryeministrit Edi Rama është rruga drejt zgjidhjes së krizës politike. Goxhaj kërkoi krijimin e një qeverie tranzitore apolitike, me një kryeministër të propozuar nga Presidenti i Republikës, duke argumentuar se zgjedhjet e parakohshme brenda 45 ditëve nuk do t’u linin kohë grupimeve të reja politike të organizoheshin. Nga ana tjetër, Nikoll Lesi ngriti shqetësimin se krijimi i shumë partive të reja mund të fragmentonte votën e opozitës së re. Goxhaj u përgjigj se grupimet që mund të dalin nga protestat kanë dallime ideologjike dhe nuk mund të bashkohen domosdoshmërisht në një parti të vetme.
Pjesë nga debati
Goxhaj: Zgjidhja është shumë e thjeshtë. Pra kryeministri i Republikës së Shqipërisë i hap rrugën zgjidhjes politike, sepse është ai që është barriera e kësaj zgjidhje.
Lesi: Si? Me dorëheqje.
Goxhaj: Absolutisht. jep dorëheqjen. Shkojmë në një qeveri tranzitore apartiake. Kemi kërkuar një qeveri apartiake. Kushtetuta e Republikës së Shqipërisë ka dy pika. Pra, në momentin që kryeministri i Republikës së Shqipërisë jep dorëheqjen, Kushtetuta përcakton se si zëvendësohet dhe thotë neni, pika një e këtij neni thotë që pasi kryeministri jep dorëheqjen, mazhoranca propozon një kryeministër dhe ky kryeministër shkon për votim. Pra, ne kërkojmë që kjo pikë mos të aplikohet. Pra, mazhoranca mos propozoj, po të aplikohet pika dy e të njëjtit nen, e cila thotë që presidenti propozon një kryeministër dhe nuk përcakton se nga e merr, por ama ne kemi kërkuar që ky kryeministër të jetë a partiak, a politik.
….
Zgjedhjet e parakohshme për 45 ditë ne nuk i pranojmë sepse në këto zgjedhje të parakohshme për 45 ditë ti nuk ke kohë të regjistrosh as partinë, sepse nga ky grupacion nga kjo protestë nuk do dali vetëm një parti nga kjo protestë, do dalin shumë parti të reja.
Lesi: Kjo protestë e madhe duhet të nxjerrë vetëm një parti, një një parti që të shkojë votuesi i pakënaqur me Saliun dhe Ramën, thotë do votojë partinë e re, fjala vjen PARTI E PROTESTES, po një, e jo 20 parti .