Nga Qamil Xhani
Teksa ka firmosur letrën e dorëheqjes, Artan Didi duhet të ketë kaluar në mendjen karrierën e tij në Forcat e Rendit. Nga Ministria e Mbrojtjes tek Ministria e Brendshme, rasti e ka sjellë të përplaset me politikën. Fillimisht në vitin 2005, kur u largua nga detyra pas ardhjes së PD-së në pushtet, për shkaqe reformash politike. Dje sërish u ka thënë “lamtumirë armëve” për një çështje ku sërish përzihet politika. Në tekstin e dorëheqjes, Didi merrte përgjegjësinë morale për një shkelje të rëndë të dy zyrtarëve të policisë në zyrën e Interpolit në Tiranë. Praktikisht, dy vartësit e tij kanë shmangur ndjekjen penale për një deputetë të Kuvendit të Shqipërisë, Mark Frroku, i cili ka një proces ende të pambyllur me drejtësinë. Largimi i Didit është një veprim moral ndaj shkeljes së ligjit, por kjo nuk i jep fund gjithë historisë që nuk përfundon vetëm tek Drejtori i Interpolit apo Drejtori i Policisë. Madje, largimi i Didit vetëm i shton pikëpyetjet për rastin “Frroku”, por edhe për mënyrën sesi funksionojnë institucionet e vendit.
Duket jo normale, që dosjen e një deputeti ta ketë “fshehur” nga Ministria e Brendshme dhe Prokuroria e Përgjithshme, një vartës i vartësit të Drejtorit të Policisë. Aq më pak dhe mundësia e lapsusit teknik. Shefi i arrestuar i Interpol Tirana, Artan Bajraktari, i trajnuar dhe specializuar nga FBI-ja dhe Interpol, si zor ta ketë flakur karrierën e tij vetëm për një gabim shtypi. Aludimet janë të qarta se dosja e Frrokut duhet të mbahej në heshtje përsa kohë të ishte e mundur. Nuk ishte diçka që jo zyrtarisht nuk njihej. Opozita prej një viti kishte denoncuar problemet me drejtësinë të deputetit, që ishte pjesë e koalicionit të Partisë Socialiste. Mediat kanë shkuar në jo pak raste për gjyqin e tij në Belgjikë. Në gjithë këtë situatë, kemi deputetin që ka folur disa herë duke këmbëngulur se nuk ka probleme me drejtësinë dhe vetë institucionet shqiptare që e paskan ditur, por e kanë fshehur. Pra, të gjithë e dinin, por tani që skandalet po pasojnë njëri-tjetrin, gjithë përgjegjësia kalon tek kreu i Policisë së Shtetit. Shkresat e fundit të Interpolit tregojnë se dokumentet janë “fshehur” që në vitin 2014 dhe jo në janar të vitit 2015. Një informacion i tillë nuk mund të mbahej i fshehur për një kohë të gjatë vetëm nga një specialiste apo shef i Interpolit në Tiranë. Aq më tepër, kur e dinin që rrezikonin burgun, siç edhe ndodhi mbrëmjen e së hënës. Këtu nuk bëhet fjalë se informacioni iu fsheh publikut, apo u ruajt ndonjë sekret hetimor apo shtetëror. Këtu është vënë në pikëpyetje serioziteti i shtetit duke lënë, sipas dyshimeve të prokurorisë, një të kërkuar ndërkombëtar për vrasje, të shëtiste lirisht dhe të votonte ligje në sallën e Kuvendit. Për më tepër, institucionet e drejtësisë janë vënë në pikëpyetje edhe përballë partnerëve ndërkombëtarë . Si mund të besohet për bashkëpunim tek policia shqiptare për luftën kundër trafiqeve, kundër terrorizmit apo çështjeve të tjera, kur prej muajsh nga Tirana nuk bëhej asnjë procedurë normale verifikimi?
Largimi i djeshëm i Didit, është një veprim i cili i heq edhe atë pjesë të suksesit që pati në drejtimin e Policisë së Shtetit. Aksionet e Lazaratit, Malësisë së Madhe, kapja e sasisë më të madhe të kokainës në Xibrakë ishin operacione që mbanin firmën e kreut të Policisë. Përballë një policie të para vitit 2013, Didi solli një model ndryshe të funksionimit të forcave të rendit. Por sado sukses që të ketë pasur si Drejtor i Policisë, rasti “Frroku” e hodhi poshtë modelin e tij. Ndryshimet duket se ishin vetëm në formë, sepse historia e dosjes së Interpolit nuk ka asnjë ndryshim me policinë e para vitit 2013. Ky rast është një sinjal për ministrin Tahiri. Si drejtues i Ministrisë më të madhe dhe më të rëndësishme në vend, skandali që plasi duhet ta bëjë të mendojë se sado të kërkoj transformimin e forcave të rendit, vetëm një shkresë e vartësve të tij mund të bëjë pis gjithë punën që ka bërë. Në këtë pikë, nuk mund të flitet për Didin vetëm si funksionar i lartë i policisë. Dëmi moral që kjo histori i ka sjellë Policisë, do të shihet edhe më vonë. I akuzuar që në ditën e parë të marrjes së detyrës si një përfaqësues politik i zgjedhur nga Kryeministri dhe Ministri i Brendshëm në Drejtorinë e Policisë, Didi dje vetëm sa konfirmoi dyshimet e opozitës. Hyri në polici si një ish-ekspert i nxjerrë në lirim politikisht nga PD-ja në vitin 2005 dhe po largohet si një drejtues policie, siç duket i përdorur politikisht.