Ben Blushi dje ka qenë shumë i ashpër me qeverinë e Edi Ramës kur insistoi disa herë të dinte nga zv/ministri i financave se ku kanë shkuar qindra milionë euro borxhe të cilat janë marrë nga qeveria, por nuk janë hedhur në investime publike apo në të mirë të jetesës së popullit. Deputeti i PS-së në një prej seancave më të rëndësishme kur po diskutohej buxheti i Ministrisë së Jashtme kërkoi të dinte, ai dhe publiku, se sa lekë janë marrë borxh saktësisht dhe ku kanë shkuar. Zv/Ministri i Financave, Erjon Luci u mundua t’i ikte përgjigjes. Ose nuk e dinte saktësisht ose donte të merrte përgjigje me sms nga shefat e tij nëse duhej t’i tregonte apo jo deputetit Blushi, që njihet si deputeti socialist i cili kritikon hapur Edi Ramën për mënyrën e qeverisjes. Siç duket e mori dikur përgjigjen nga “lart”. Ja një pjesë e debatit të Blushit me përfaqësuesin zyrtar të Qeverisë:
Ben Blushi:"Kjo është arsyeja që ranë nga pushteti këta (nënkupto PD-në), e di pse? Se morën më shumë borxh se ç'mund të paguanim ne. Pse e morëm ne gjithë këtë borxh, vetëm për arsyet e tyre? Por këta ranë nga pushteti, ranë pra se e çuan borxhin mbi 60 %. Atë kohë ne si PS thamë që borxhi të jetë nën 60 %.
Pra ti vjen sot mbas tre vjetësh dhe më thua, jo mo vlla do të kishim marrë dhe pak më shumë se kemi marrë shumë më pak….
Çfarë po bëni sot në Shqipëri me këtë borxh, paguani rrogat? Po nuk mund të marrim borxh për të paguar rrogat. Po ndërtoni, çfarë? Ka dy vjet që nuk bëhet asnjë metër, asnjë metër rrugë. Ku shkojnë pra lekët, për çfarë marrim borxh ne, për rroga, për pensione? Po në qoftë se ne marrim borxh për pensionet ky shtet ka falimentuar se vetëm kulla dhe shatërvanë po bëni. Merrni borxh për shatërvanë ju? Për fasada, për stadiume, për kulla, për pishina? Këto janë borxhi që po paguajmë ne. Më thoni një metër rrugë se nuk po shoh asnjë metër rrugë prandaj ta përmenda dje atë. Keni marrë borxh për pishina se po bëhet pishinë në Durrës, e di. Me borxh. Po nuk ka vend që merr borxh për të bërë pishinë. Ka shtete që marrin borxh për punë të mëdha, por jo për pishina, as për kulla, as për stadiume, as për palestra dhe kjo nuk quhet punë. E di çfarë quhet kjo? Lluksokraci", tha Blushi.
Kritikat e Ben Blushit kanë ardhur përditë duke e rritur forcën e tyre në raport me qeverisjen , e cila, sipas deputetit nuk po bën asnjë metër rrugë e investime për të punësuar njërëzit, por për salltanete. Ai përmendi një borxh që ka marrë qeveria Rama për t’i bërë pishinë kryetarit të Bashkisë në Durrës Vangjush Dako, i cili njihet si një ndër miqtë me potencialë të kryeministrit Rama. Ka filluar viti i tretë qeverisë së mazhorancës e ndërkohë që baza e PS-së dhe vetë kreu i LSI-së Ilir Meta po kërkojnë për të ndryshuar ministrat e mënyrën e qeverisjes pasi jo vetëm vendi po shkon në krizë totale ekonomike, porse edhe e majta po humbet terren e vota. Nga ana tjetër Edi Rama nuk pranon në asnjë mënyrë të bëjë ndryshime, pasi ministrat po punojnë mirë, siç thotë Kryeministri. Por sado mirë të punojnë sipas tij, në çdo rast ka nevojë për freskime në kabinet. Kokëfortësia e Ramës për të mos e hapur fare as si bisedë çështjen e ndërrimit të ministrave ka mundësi t’i kushtojë shtrenjtë PS-së në zgjedhjet e vitit 2017. Aq me tepër që edhe LSI, e cila është forcuar shumë në vota, por edhe prej pabesive të PS-së vitin e fundit, po i sillet variantit që të kandidojë e vetme në zgjedhjet e vitit 2017. Dhe nuk i dihet Sovranit të cilit nuk i ke shtruar asnjë metër rrugë të re, siç thotë Blushi, apo faktit që LSI po lëviz shpejt duke reformuar vetveten në raport me kohën, pra ka mundësi të sjellë turbulencë në oborrin e PS-së. Nuk duhet harruar se Blushi është një potencial dhe intelektual me shumë peshë në publik dhe nëse krijon forcë të re politike për të shmangur bjerrjen e PS-së nga keqqeverisja e këtyre ministrave do të sjellë tablo të re politike në krahun e majtë. PS-ja mund të humbasë vendin si parti e parë tradicionale dhe të ngjitet LSI, duke e çuar PS-në një pikë para partisë së Blushit, e cila gjithsesi e sigurtë mbetet se do të jetë parti e tretë në të majtën shqiptare.
Ka filluar rrokullima në PS! Edi Rama vetëm mund t'i ndalojë vrullin e rrokullimës, ndërsa për ta ndaluar atë e kanë në dorë vetëm dy veta: Ilir Meta dhe Ben Blushi.
Ose vetëm Edi Rama nëse ndryshon Qeverinë dhe mënyrën e qeverisjes.
A. Prulli