Në çdo qytet të Shqipërisë po marshohet për abuzimet seksuale me të mitur. Në vitin 2019 u regjistruan 28 raste të marrëdhënieve seksuale ose homoseksuale me të mitur, 10 raste më shumë se në vitin 2018. Po ashtu, edhe numri total i veprave penale që lidhen me krimet seksuale është rritur me 40 %, nga 110 raste në 2018-ën, në 155 raste në 2019-ën. 5% e të akuzuarve për këto krime kanë qenë punonjës të administratës shtetërore, si në rastin e fundit të Abaz Dogës, rojës së shkollës.
Sipas Mirgit Vataj, nga linja kombëtare e këshillimit për fëmijët ”ALO 116”, policia duhet të kryejë më shumë hetime pro-aktive në dhomat e chat-it online, ku dyshohet se “kamuflohen” pedofilë. Psikologia klinike, Almeida Xhaferi inkuadron si problem rolin inaktiv të psikologëve në shkolla dhe kërkon të futet në kurikula edukimi ligjor.
I të njëjtit mendim me të është edhe pedagogu dhe eksperti i arsimit, Ndriçim Mehmeti i cili shikon të nevojshme edhe ngritjen e institucioneve të rehabilitimit për të miturit. Për sociologun Gëzim Tushe, këto raste të shthurjeve të turpshme tregojnë një lloj krize seksuale në shoqërinë shqiptare.
