Këshilli i Ministrave ka emëruar sot Avokatin e ri të Shtetit, pas largimit nga kjo detyrë të Artur Metanit, i cili u zgjodh Inspektor i Lartë i Drejtësisë. Kryeministri Edi Rama ka firmosur për detyrën e re emrin e avokates Enkelejda Muçaj. “Në mbështetje të nenit 100 të Kushtetutës dhe të pikës 1, të nenit 21, të ligjit nr.10018, datë 13.11.2008, “Për Avokaturën e Shtetit”, të ndryshuar, me propozimin e Kryeministrit, Këshilli i Ministrave VENDOSI: Znj. Enkelejda Muçaj emërohet Avokat i Përgjithshëm i Shtetit. Ky vendim hyn në fuqi menjëherë”,- thuhet në njoftimin e Këshillit të Ministrave.
Enkelejda Muçaj ka një përvojë të gjerë në kryerjen e proceseve gjyqësore në çështje mjedisore. Ajo ka vepruar si pjesë e ekipit të këshilltarëve juridikë të Bankës Evropiane për Rindërtim dhe Zhvillim në aktivitete të ndryshme të financimit të projektit, dhe ka vepruar si Këshilltar Ligjor i Ministrit të Kulturës Rinisë dhe Sporteve të Shqipërisë (pozicioni i mbajtur në vitet 1998-2000). Në këtë periudhë kohore ministër i Kulturës ka qenë Edi Rama.
Pjesë e përvojës së saj si avokate, vitet e fundit janë dhe mbrojtja e çështjeve personale të kryeministrit Edi Rama në proceset gjyqësore. Së fundi, ajo është avokatja kryesore e kreut të qeverisë në paditë për shpije që ka bërë ndaj mjaft gazetarëve dhe përfaqësuesve të opozitës.
