Një zjarr ka rënë në kuzhinën e një hoteli në lagjen “18 Shtatori” në Gjirokastër, por ndërhyrja e shpejtë e zjarrfikësve ka bërë të mundur izolimin e flakëve pa pasoja të rënda.
Shërbimi i MZSH-së u njoftua rreth orës 15:03 për situatën dhe menjëherë dërgoi në vendngjarje grupin e ndërhyrjes. Pas mbërritjes, zjarrfikësit konstatuan se flakët kishin përfshirë kuzhinën e lokalit, ku ndërhynë me fikëse pluhuri dhe ujë.
Zjarri u shua plotësisht në kohë, duke parandaluar përhapjen e flakëve në pjesët e tjera të hotelit.
Nga verifikimet paraprake dyshohet se shkak i zjarrit është bërë një pajisje gazi, mbi të cilën ishte vendosur një tenxhere për ngrohjen e ujit dhe që kishte mbetur e ndezur.
Nga incidenti janë shkaktuar vetëm dëme të vogla materiale, ndërsa nuk raportohet për persona të lënduar.