Shqipëria nuk është më një destinacion që thjesht premton por është një destinacion që po shkruan historinë e vet. Future Hospitality Forum 2026, edicioni i parë i organizuar nga Agjencia Shqiptare e Zhvillimit të Investimeve (AIDA), mbahet në Teatrin Kombëtar të Operas dhe Baletit (TKOB) dhe mbledh zhvilluesit shqiptarë, investitorët dhe disa prej brendeve më të njohura e më prestigjioze të hotelerisë botërore. Ky forum lind nga një e vërtetë e thjeshtë : turizmi shqiptar po rritet me një shpejtësi që kapaciteti hotelier nuk e ndjek dot. Kërkesa është këtu. Interesi i emrave më të mëdhenj të industrisë globale është këtu. Ajo që mungonte ishte tryeza ku ky interes kthehet në projekt konkret. Future Hospitality Forum është pikërisht ajo tryezë dhe momenti kur Shqipëria zë vendin që meriton në hartën botërore të investimeve në mikpritje.
Çfarë ndodh në forum?
Mbi 100 projekte shqiptare do të prezantohen para disa prej brendeve më të fuqishme e më të respektuara të hotelerisë në botë, të cilat do të ulen si vlerësues dhe partnerë potencialë, jo si spektatorë. Paralelisht, vetë këto marka globale do të ndajnë vizionin, modelet e tyre të suksesit dhe kriteret për afiliim, nga dizajni dhe shkalla te lokacioni dhe struktura e menaxhimit. Takimet B2B të para-organizuara do t’i japin këtij dialogu dimensionin konkret që industria pret prej vitesh — një urë e vërtetë mes ambicies shqiptare dhe ekspertizës globale. Forumi do të hapet me fjalimin kryesor të Kryeministrit të Shqipërisë, Edi Rama.
Panelet e forumit
Në 2 panelet që do të zhvillohen do të marrin pjesë figura kyçe të sektorit të mikpritjes, si përfaqësues të nivelit të lartë nga institucionet kryesore të investimeve dhe zhvillimit në Shqipëri, drejtues të agjencive kombëtare të turizmit dhe zhvillimit të territorit, si dhe zëvendësministra dhe ekspertë të financave. Por ajo që e bën këtë forum vërtet ndërkombëtar është prania e drejtuesve më të lartë të disa prej grupeve më të mëdha hoteliere në botë, të cilët do të sjellin në Tiranë ekspertizën e tregjeve globale — nga Europa Jugore dhe Lindore, deri në destinacionet më të kërkuara të hotelerisë luksoze.
• Panel I: Developing Albania’s Hospitality Sector: From Investment to Growth – një dialog mes institucioneve shqiptare të investimeve, zhvillimit të territorit dhe financave mbi hapat konkretë që duhen ndërmarrë për të kthyer potencialin në rritje reale.
• Panel II: Albania’s Next Hospitality Investment Wave – drejtues të lartë të grupeve ndërkombëtare hoteliere, përfshirë Accor, Wyndham dhe Minor Hotels, ndajnë çfarë kërkojnë brendet globale kur zgjedhin destinacione të reja dhe pse Shqipëria është sot emri që po përmendet gjithnjë e më shumë në qarqet ndërkombëtare të investimeve.
Tri zonat tematike të forumit
Forumi është strukturuar mbi tri zona kyçe që konsiderohen shtylla e potencialit turistik shqiptar:
• Zona Urbane – zhvillimi i hotelerisë në qytete, me fokus tek eksperienca urbane dhe infrastruktura moderne e mikpritjes.
• Zona Bregdetare – resortet dhe investimet përgjatë bregdetit Adriatik dhe Jon, drejt një turizmi bregdetar të qëndrueshëm.
• Zona Malore – strehimet dhe zhvillimet boutique në zonat malore, si segment në rritje i turizmit alternativ.
Kush ka konfirmuar pjesëmarrjen
Në këtë forum do të marrin pjesë ndër 15 emrat më të mëdhenj të hotelerisë botërore: si Accor Luxury, Minor Hotels, Wyndham Hotels & Resorts, Falkensteiner Hotels and Residences, Sunset Hospitality Group, Iberostar, Banyan Group, CDS Hotels, Club Esse, METT, Elite World Hotels & Resorts, Hyatt Inclusive Collection, HO Collection, Majestic Hospitality si dhe firma prestigjioze këshilluese. Shqipëria po e shkruan vetë historinë e saj si destinacioni më dinamik i rajonit. Bashkohuni me ne më 2 Tetor, në TKOB.
