Gjergji Nika tregon ambicien për të kandiduar për drejtimin e Bashkia e Vlorës në zgjedhjet lokale të vitit 2027, duke e konsideruar veten një nga emrat potencialë të opozitës për garën në qytetin bregdetar. Në një intervistë për ”A2 CNN”, Nika u shpreh se synimi i tij është që kandidatura për Vlorën të dalë nga një proces konsensual mes forcave opozitare dhe të mbështetet tek kandidati që arrin të maksimizojë votën qytetare.
“Unë e shikoj veten si një nga kandidatët në vitin 2027 për zgjedhjet në Bashkinë e Vlorës dhe këtë po ua them edhe publikisht. Kjo do të jetë në dakordësi të të gjitha forcave politike”, deklaroi ai gjatë intervistës.
Nika kujtoi gjithashtu eksperiencën e tij në garën e mëparshme politike, duke theksuar se kishte arritur të siguronte rreth 10% të votave në një periudhë shumë të shkurtër fushate. Sipas tij, ky rezultat tregon se ekziston një mbështetje reale për alternativën që ai përfaqëson dhe se opozita duhet të ndërtojë një strategji të përbashkët për të fituar drejtimin e bashkisë së qytetit.
Ai zbuloi se çështja e kandidaturës për Vlorën është diskutuar edhe në tryezat e opozitës. “Unë e kam thënë edhe në tavolinë me frontin opozitar ditën e djeshme: ne duhet të nxjerrim kandidatin më të mirë. Kush është ai që maksimizon votën dhe kush është ai që bën maksimumin për të kthyer Bashkinë e Vlorës”, u shpreh Nika.