Qeveria ukrainase po organizon një takim midis presidentit Volodymyr Zelensky dhe presidentit të zgjedhur të SHBA-së, Donald Trump.
Ministri i Jashtëm, Andrii Sybiha konfirmoi planet në një konferencë të përbashkët për shtyp me kryediplomatin e BE-së Josep Borrell në Kiev të shtunën, disa ditë pasi Trump siguroi një mandat të dytë historik në Shtëpinë e Bardhë.
“Dialogu midis Trump dhe Zelensky tashmë është vendosur”, tha Sybiha, pasi dy liderët u raportuan se kishin zhvilluar një telefonatë, së cilës iu bashkua edhe miliarderi Elon Musk.
Sybiha shtoi se “ne jemi të hapur për bashkëpunim të mëtejshëm.”
Trump dhe Zelensky u takuan për herë të fundit në Nju Jork në fund të shtatorit, kur udhëheqësi ukrainas udhëtoi për në Shtetet e Bashkuara për të paraqitur “planin e tij të fitores” për të mposhtur Rusinë.
Pikat kryesore të planit përfshijnë dërgesa të mëtejshme të armëve perëndimore në Kiev dhe një ftesë për t’u bashkuar me NATO-n në të ardhmen e afërt.
”Fitorja në zgjedhje e Trump ka pasoja globale”, theksoi Sybiha.
Ndërsa SHBA ka qenë aleati më i rëndësishëm i Ukrainës që nga pushtimi rus në shkallë të plotë në shkurt 2022, Trump ka kërcënuar vazhdimisht se do të tërheqë ndihmën për Kievin./ a.jor. ATSH