Kreu i grupit parlamentar të PD-së, Gazment Bardhi i është përgjigjur deklaratave të Taulant Ballës, i cili i kërkoi të dorëzojnë mocion mosbesimi për qeverinë. Në një deklaratë për mediat, Bardhi i tha Ballës se nuk i sugjeron ai aksionet e grupit të PD-së, duke shtuar me ironi se e vetmja gjë që mund të sugjerojë është miratimi i ndonjë ligji që favorizon Artur Shehun, pronarin e tokave ku do të ndërtohet resorti në Zvërnec.
“Aksionet e grupit të PD në kuvend nuk i sugjeron Balla, e vetmja gjë që sugjeron Balla është të miratojë ligj për ti dhënë favor Artur Shehut dhe grupeve kriminale në vend. Çdo lëvizje e PD duhet të jetë realiste dhe mos të bëhet për shoë politik. E sigurt është që Balla është kreu i grupit, në një grup ku gjysma e grupit e urren për shkak të sjelljes së tij në raport me deputetët. Imagjinoni tani urrejtjen që kanë shqiptarët”, tha Bardhi.
Nga ana tjetër, Bardhi e quajti të pabazë refuzimin nga ana e PS-së për mocionin me debat për protestën dhe raportin e Parlamentit Europian. ”Protesta e qytetarëve shqiptarë ka marrë vëmendjen e eurodeputetëve në seancën e fundit plenare të Parlamentit Europian. I vetmi parlament në rruzullin tokësor që nuk i ka kushtuar asnjë vëmendje shqetësimeve të qytetarëve prej 26 ditësh në shesh është Parlamenti i Shqipërisë. Me përgjegjësinë e plotë që na dikton detyra si parlamentarë. Ai duhet t’i japë informacion Kuvendit të Shqipërisë nëse ka marrë apo jo ndonjë masë për të adresuar këto shqetësime”, tha Bardhi,
