Nëntë varka me 572 persona në borde u kapën duke kaluar sot La Manshin, sipas Ministrisë së Brendshme të Britanisë së Madhe.
Kjo e çon numrin total të emigrantëve që kanë mbërritur deri më tani këtë vit në 32 691, që është 22% më shumë në të njëjtën kohë të vitit të kaluar (26 699), por ende 18% më pak se sa ishte regjistruar në nëntor 2022 (39 929).
Kalimet e fundit vijnë pasi kryeministri Keir Starmer ka hyrë në një nismë të re për të kapur bandat kriminale që kontrabandojnë emigrantë nëpër Ballkanin Perëndimor, si pjesë e përpjekjeve për të ulur numrin e kalimeve me varka të vogla.
Starmer njoftoi marrëveshje për të rritur ndarjen e informacioneve sekrete, ekspertizën dhe bashkëpunimin me Serbinë, Maqedoninë e Veriut dhe Kosovën në një takim të Komunitetit Politik Evropian në Budapest.
”Të martën dhe të mërkurën katër trupa u zbuluan në ujë në brigjet e Kalesë”, tha roja bregdetare franceze.
Policia e Kentit, nga ana angleze, tha gjithashtu se ”trupi i një burri u nxor nga La Manshi të martën, ndërsa oficerët u thirrën për operacione shpëtimi në Dover”.
Hetimet kanë nisur për vdekjet dhe autoritetet ende nuk kanë konfirmuar nëse ata që vdiqën ishin emigrantë.
Rreth 50 persona kanë vdekur gjatë përpjekjes për të kaluar La Manshin këtë vit, sipas incidenteve të regjistruara nga roja bregdetare franceze, të cilat nuk përfshijnë vdekjet më të fundit.
Starmer u zotua gjithashtu se qeveria do t’i “trajtojë kontrabandistët e njerëzve si terroristë”./ a.jor. ATSH