Numri i të vdekurve në konfliktin e vazhdueshëm në Lindjen e Mesme vazhdon të rritet, ndërsa Teherani nisi një valë të re sulmesh vdekjeprurëse ndaj Izraelit gjatë natës dhe Izraeli shënjestroi industrinë energjetike të Iranit.
”Të paktën tetë persona u vranë dhe rreth 200 u plagosën në Izrael pas sulmeve gjatë natës”, raportuan sot mediet lokale duke cituar punonjësit e shpëtimit.
Sipas shërbimit të shpëtimit ”Magen David Adom”, dy fëmijë dhe të paktën dy persona të tjerë u vranë në qytetin izraelit Bat Yam kur një raketë goditi një ndërtesë banimi sot herët në mëngjes.
Kishte gjithashtu raportime për ndërtesa të goditura në Tel Aviv dhe Jerusalem.
Ndërkohë, Forcat e Mbrojtjes Izraelite (IDF) thanë se kishin kryer një “seri të gjerë sulmesh ndaj objektivave në Teheran”.
IDF tha se objektivat përfshinin Ministrinë iraniane të Mbrojtjes dhe vende të tjera që lidhen me “përpjekjet e regjimit iranian për të siguruar një armë bërthamore dhe ku regjimi iranian fshehu arkivin e tij bërthamor”.
Izraeli filloi të sulmonte Iranin të premten në mëngjes, duke synuar objektet bërthamore, figurat kryesore ushtarake, shkencëtarët më të lartë bërthamorë, pozicionet e mbrojtjes, qytetet dhe objektet e naftës.
Që atëherë, sipas shifrave zyrtare, dhjetëra njerëz janë vrarë dhe qindra të tjerë janë plagosur në Iran.
Irani tha se sulmet ajrore ishin një deklaratë lufte dhe ka qëlluar qindra raketa dhe dronë drejt Izraelit në shenjë hakmarrjeje.
IDF tha sot herët se objektivat e fundit përfshinin selinë e një organizate shtetërore iraniane për kërkime bërthamore në Teheran, e njohur si Organizata e Inovacionit dhe Kërkimit Mbrojtës. ATSH