Pas Meshës, kremtuar sot paradite në Sheshin e Shën Pjetrit në Vatikan, Papa Leoni XIV në mesditë, kremtoi lutjen mariane të Mbretëreshës Qiellore. Në përfundim, i përshëndeti dhe i falënderoi të gjithë të pranishmit për pjesëmarrjen në këtë ditë të lumtur të Jubileut të Familjeve, Fëmijëve, Gjyshërve dhe të Moshuarve!
Në fund të kësaj Eukaristie, dua t’ju përshëndes të gjithëve, pjesëmarrës në Jubileun e Familjeve, Fëmijëve, Gjyshërve dhe të Moshuarve! Erdhët nga çdo cep i botës, me delegacione nga njëqind e tridhjetë e një vende.
Këto, fjalët e para, të ngrohta, që Papa Leoni XIV ia drejtoi, nga dritarja e Pallatit Apostolik, turmës së pafundme që mbushte përplot Sheshin e Vatikanit, i cili të kujtonte vazhdimësinë e jetës njerëzore në këtë ditë feste kushtuar kryesisht të moshuarve. Por edhe fëmijëve, që Papa Prevost i priti me gëzim e dashuri. E i përshëndeti me fjalët:
Jam i lum që mirëpres kaq shumë fëmijë, të cilët na ringjallin shpresën! I përshëndes të gjitha familjet, Kishat e vogla shtëpiake, në të cilat Ungjilli mirëpritet dhe trashëgohet.
Familja – thoshte Shën Gjon Pali II – buron nga dashuria me të cilën Krijuesi përqafon botën e krijuar (Letra Gratissimam sane, 2).
Përshëndetje e urime
Papa Leoni XIV vijoi t’i drejtonte turmës së besimtarëve urimet më të ndjera. Feja, shpresa dhe bamirësia – u tha Ati i Shenjtë – u rritshin gjithmonë në familjet tona. E më pas i përshëndeti veçanërisht gjyshërit dhe të moshuarit, të cilët janë model i vërtetë besimi dhe frymëzimi për brezat e rinj. Faleminderit që erdhët – u tha – e vijoi me një përshndetje drejtuar mbarë turmës së pafundme, mbledhur këtë ditë të lume:
I përshëndes të gjithë shtegtarët e pranishëm, veçanërisht ata nga Dioqeza e Mondovì-t, në Piemonte.
Festa e të Ngjiturit të Zotit në Qiell
Sot në Itali dhe në vende të ndryshme – vijoi të kujtojë Papa – festohet solemniteti i të Ngjiturit të Zotit në Qiell.
Është festë shumë e bukur, që na bën të shikojmë drejt cakut të shtegtimit tonë tokësor.
Ndërmjetësimit të martireve ia besojmë të gjitha gratë
Në këtë horizont – vijoi Papa – po kujtoi se dje në Branievo (Poloni) u shpallën të Lume Cristofora Klomfass dhe katërmbëdhjetë motra të Kongregacionit të Shën Katerinës, Virgjëreshë e Martire, vrarë në vitin 1945 nga ushtarët e Ushtrisë së Kuqe në territoret e Polonisë së sotme. Pavarësisht klimës së urrejtjes dhe terrorit kundër fesë katolike, ato vijuan t’u shërbenin të sëmurëve dhe jetimëve. Ndërmjetësimit të martireve të reja të Lume ia besojmë të gjitha gratë fetare në botë që me bujari e flijojnë veten për Mbretërinë e Zotit.
Në përfundim, Papa Leoni XIV i drejtoi Marisë Virgjër lutjen:
“Virgjëra Mari i bekoftë familjet dhe i mbështetët në vështirësitë e tyre: Mendoj veçanërisht për ata që vuajnë për shkak të luftës në Lindjen e Mesme, në Ukrainë dhe në pjesë të tjera të botës. Nëna e Zotit na ndihmoftë të ecim së bashku në rrugën e paqes”.
Radio Vatikani