Kanë vazhduar edhe në fundjavë homazhet për Princin Filip të Mbretërisë së Bashkuar. Pallati mbretëror do qëndrojë në zi për dy javë, ndërkohë që të shtunën do organizohet funerali i 99-vjeçarit, vetëm për pjesëtarët e familjes.
Mbretëria e Bashkuar vijon të mbajë zi për ndarjen nga jeta të Princit Filip, bashkëshortit të Mbretëreshës Elizabeta e Dytë.
Periudha e zisë dhe flamurët do të mbeten në gjysmështizë deri më 17 prill, kur trupi i tij do të prehet në kapelën e rezidencës mbretërore.
Një minutë heshtje do të shënojë fillimin e funeralit në orën 15 të së shtunës.
Ceremoninë mortore do e ndjekin vetëm familja e ngushtë e 99-vjeçarit, fëmijët dhe nipërit e tij.
Princi Herri pritet të udhëtojë nga SHBA-ja, pa bashkëshorte e tij shtatzënë.
Në rrethanat e pandemisë, publiku është apeluar ta ndajë hidhërimin nga shtëpia.
Edhe kryeministri Boris Xhonson ka njoftuar se nuk do të jetë i pranishëm në funeral.
Një ditë më parë, Princi Çarls, i biri i monarkut të ndjerë, tha se e ndjente mungesën e babait.
“Ishte figurë shumë e dashur dhe e vlerësuar, dhe mendoj se do të prekej thellë nga numri i personave këtu dhe nëpër botën e Komonuelthit që ndajnë me ne humbjen e tij dhe hidhërimin. Babai im ishte person shumë i veçantë.”
Princi Filip u nda nga jeta paraditen e së premtes, duke lënë pas katër fëmijë me mbretëreshën Elizabeta e Dytë, ndërsa më 10 qershor do të festonte ditëlindjen e 100.