SHBA-ja dhe Irani mund të jenë pranë arritjes së një marrëveshjeje, ndërsa negociatat për zhbllokimin dhe menaxhimin e Ngushticës së Hormuzit po shënojnë përparim.
Ministri pakistanez i Mbrojtjes, Khawaja Asif, deklaroi se zhvillimet e fundit tregojnë se palët janë “pranë një lloj marrëveshjeje”. Edhe Katari konfirmoi se diskutimet mes Omanit dhe Iranit për menaxhimin e ngushticës janë në një fazë të avancuar.
Ndërkohë, ministri i Jashtëm iranian, Abbas Araqchi, u takua në Teheran me ministrin e Brendshëm të Pakistanit, Mohsin Naqvi, në kuadër të përpjekjeve diplomatike.
Ngushtica e Hormuzit është një prej korridoreve më të rëndësishme energjetike në botë, përmes së cilës para përshkallëzimit të konfliktit transportohej rreth një e pesta e naftës dhe gazit natyror të lëngshëm globalisht.
Megjithatë, tensionet mbeten të larta pas raportimeve për incidente të reja ndaj anijeve në ujërat e rajonit.