Presidenti i Vladimir Putin ka dërguar mesazhe urimi për Vitin e Ri pers, Novruzin, drejtuesve të Iran, duke theksuar se Rusia mbetet një aleat i qëndrueshëm për Teheranin në një periudhë të trazuar.
Sipas Kremlinit, Putin uroi liderin suprem iranian dhe presidentin Masoud Pezeshkian, duke shprehur mbështetje për popullin iranian për të përballuar sfidat aktuale. Në mesazhin e tij, ai theksoi se Moska do të vazhdojë të jetë “një mik besnik dhe partner i besueshëm” për Iranin.
Megjithatë, pas deklaratave zyrtare, mbetet në diskutim niveli real i mbështetjes ruse. Burime nga Teherani sugjerojnë se ndihma konkrete nga Moska ka qenë e kufizuar gjatë krizës më të rëndë për Iranin që nga revolucioni i vitit 1979.
Ndërkohë, Rusia ka dënuar ashpër sulmet e SHBA-së dhe Izraelit ndaj Iranit, duke i cilësuar ato si faktor destabilizues për Lindjen e Mesme dhe shkaktarë të një krize globale energjetike.
Në të njëjtën kohë, raportime mediatike kanë hedhur dritë mbi një propozim të diskutueshëm të Moskës ndaj Uashingtonit: ndalimin e ndarjes së informacioneve me Iranin në këmbim të ndërprerjes së mbështetjes amerikane për Ukrainën. Kjo ide është refuzuar nga SHBA, ndërsa Kremlini e ka mohuar si të pavërtetë.
Pavarësisht afrimit strategjik mes dy vendeve, marrëdhënia nuk përfshin një marrëveshje të mbrojtjes së ndërsjellë, ndërsa Rusia ka shprehur vazhdimisht kundërshtimin ndaj mundësisë që Irani të zhvillojë armë bërthamore, nga frika e një gare të re armatimesh në rajon.