Një pjesë të krahut lindor të Shtëpisë së Bardhë ka nisur të shembet, për të nisur punimet për ndërtimin e një salle të re ballosh, pjesë e projektit 250 milionë dollarësh të Presidentit Donald Trump për “modernizimin e plotë” të rezidencës presidenciale.
Ekipet e ndërtimit u panë duke rrëzuar hyrjen lindore dhe disa dritare, ndërsa administrata konfirmoi se punimet do të shtrihen në muajt e ardhshëm.
Trump tha se salla e re do të ndërtohet “afër, por pa prekur strukturën ekzistuese”, duke e përshkruar projektin si “një shtesë madhështore që i tregon respekt historisë së ndërtesës”.
Presidenti deklaroi në rrjetet sociale se “është hedhur themelet për një hapësirë shumë të nevojshme për evente madhështore dhe vizita shtetërore”. Ai shtoi se ndërtimi financohet “plotësisht nga patriotë bujarë”, pa bërë të ditur emrat e donatorëve.
Ndërhyrja ka shkaktuar debat në qarqet historike dhe arkitektonike për mungesën e transparencës dhe procesit të rishikimit nga Shërbimi i Parqeve Kombëtare (NPS), i cili mbikëqyr ndërtesën.
“I gjithë projekti po ecën përpara pa një proces të plotë shqyrtimi – dhe kjo është e papërshtatshme për ndërtesën më të rëndësishme ekzekutive në botë,” tha për BBC ish-historiani i NPS-së, Robert K. Sutton.
Sipas tij, numri i të ftuarve që mund të strehojë salla varion nga 600 deri në 900 persona, ndërsa vizatimet e publikuara nga Shtëpia e Bardhë tregojnë ambiente luksoze me llambadarë ari dhe hapësira për evente të mëdha.
