Nga Bujar Nishani-
Opozita prej disa ditësh po denoncon korrupsionin skandaloz me tenderat e rilidsave që nuk po e ndalin hajninë dhe poshtërimin e shqiptarëve as dhe në kohën e vështirë të kolapsit të plotë të jetës.
Opozita po ju tregon shqiptarëve se kush është në të vërtetë qeveria që ata kanë!
Një qeveri që zhgërryhej restoranteve luksoze të Tiranës me oligarkët e korruptuar e që nuk arriti të kuptonte se duhej të ndalonte ardhjen e udhëtarëve nga zona e epidemisë masive në Italinë e Veriut, derisa virusi “u ul këmbëkryq” mes shqiptarëve.
Një qeveri që nuk ka ofruar asnjë ndihmë reale për qytetarët e izoluar në shtëpitë e tyre, bisneset e mbyllura dhe shërbimet e kolapsuara, ka demonstruar vetëm demagogjinë, gënjeshtrën, korruptimin për sufllaqexhinjtë dhe terrorizimin ndaj qytetarëve.
Një qeveri që dështoi të reagojë në testimin e të gjithë individëve të lidhur me vatrat aktive të virusit.
Një qeveri që deklaron të shëruar, më shumë qytetarë se sa ka deklaruar të prekur nga virusi.
Më qesharake nuk ka se ku të shkojë !!!
Një qeveri që deklaron si viktima të virusit vetëm ata persona të ndjerë që kanë ndërruar jetë në spitalin publik, por asnjë deklaratë për qytetarët që kanë humbur jetën nga virusi në banesat e tyre apo spitalet private.
Një qeveri që bëri deklaratën më skandaloze në kohën e pandemisë se “nuk do të njohë asnjë të sëmur pozitiv që ka kryer testin e sëmundjes në spitalet private”!!!!!
A ka më çmenduri se sa kjo ?
Një qeveri që pjeston mollën me dardhën, duke tentuar me stërmundim qesharak, të gënjejë shqiptarët për raportin e % (përqindjes) së vdekjeve, duke na llogaritur humbjet në njerëz në raport me popullsinë !!!!
Humbjet e njerëzve janë për shkak të sëmundjes, o mjeranë që i konsideroni shqiptarët si “njerëz me bisht”.
Llogaritja bëhet me ata që janë të sëmurë dhe jo ata që nuk janë prekur nga sëmundja !
Ata që nuk janë të prekur nuk kanë nevojë për ndihmë e trajtim, por ata që preken nga sëmundja duhen ndihmuar që të mos humbasin jetën.
Ky është treguesi se sa e përgatitur ishte kjo qeverisje dhe se si ajo reagoi gjatë sëmundjes.
Ndaj dhe i fsheh jetët e humbura prej virusit të të sëmurëve që ndërruan jetë në shtëpitë e tyre.
Por edhe në rastet e raportuara duket qartë dështimi i kësaj qeverie për të zvogëluar fatkeqësinë.
Shqipëria renditet me % e vdekshmërisë më të lartë në gjithë vendet e rajonit.
Nëse në Kroaci ajo është 1,4%, në Malin e Zi 0,8%, në Serbi 2,4%, në Kosovë 2,7%, në Bosnje & Hercegovinë 4,2%, në Greqi 4,3%, në Maqedoninë e Veriut 4,8%, në
Shqipëri raporti i personave të vdekur prej atyre të prekur nga virusi është 5,5%.
(ky raport është përllogaritur mbi të dhënat zyrtare të OBSH deri në mbrëmjen e dt. 8 prill) !
Qartazi Shqipëria ka % më të lartë të vdekjeve prej atyre që janë infektuar deri më tani.
Nuk kishte si të ndodhte ndryshe, kur qeveria në vend që të shfrytëzojë të gjithë mjetet, mekanizmat, fuqitë, pushtetin për të ndihmuar qytetarët me shpejtësi dhe standard e ka mendjen tek hajdutëria dhe korrupsioni me tenderat edhe në kohën e pandemisë.
Opozita ka denoncuar se lehtësitë dhe mundësitë ekstra-ligjore që ofrojnë procedurat e prokurimeve në situatë emergjente, po keqpërdoren për të adresuar paratë tek xhepat e sekserëve qeveritarë në vend se tek shëndeti i njerëzve.
Procedurat e tenderimeve në kohë emergjence janë më liberale dhe më të lehta.
Kjo, sepse qëllimi është të evitohet koha e gjatë e procedurës, pra ato të bëhen me urgjencë në kuptimin e “kohës” dhe jo të sajohen kompani private në mashtrim ndaj ligjit dhe paratë të dërgohen atje ku ndahet korrupsioni.
Qëllimi është t’u kërkohen oferta drejtpërdrejtë kompanive me më shumë eksperience dhe me standardet më të larta, duke evituar konkurimin procedurial dhe ku pastaj të zgjidhet më e mira dhe jo tregtarëve të kompjuterave t’u besohet ushqimi për të sëmurët!!!
Pra qëllimi i lehtësimit të rregullave të përdorimit të parave publike në kohë emergjence është që shërbimi të shkojë sa më shpejt dhe më i miri tek qytetari e jo të dhurohen paratë publike tek sekserët e korrupsionit pushtetar.
Por ky është modeli i qeverisë rilindse pasi vetëm kështu do të mundet të mbushë xhepat e avoketërve dhe demagogëve të saj, që përpiqen të mashtrojnë dhe verbojnë çdo ditë shqiptarët në interes të një pushteti që nuk ngopet me hajninë dhe korrupsionin e 7 viteve pushtetuese por turret të kafshojë sa më shumë edhe në ditë fatkeqësie kolektive.
Të vjedhësh e të korruptosh në çdo kohë, është një krim i rëndë.
Por se çfarë është që të grabisësh qytetarët dhe shtetin edhe në kohë pandemie, mund t’a thoni ju vete se çfarë është ??!!