Profesori i Komunikimit Mark Marku i ftuar në “News 24”, pak përpara protestës së opozitës të bashkuar dhe të shoqërisë civile, deklaroi se Edi Rama tashmë i ka shpallur praktikisht luftë demokracisë.
Marku tha se demokracia duhet mbrojtur me cdo kusht, pasi atë duan të na e uzurpojnë.
“Edi Rama i ka shpallur luftë demokracisë. Ne jemi një shtet gangsterësh. Rama veproi natën, si një gangster që zbret natën dhe shkatërron Teatrin Kombëtar. Ishte goditje ndaj demokracisë shumë e rëndë. Unë nuk e kuptoj këtë demonstrim force. Beteja vazhdon. Monumentet kulturore duhet të rikonstruktohet. Ky është një akt shumë i rëndë që nuk e bën as pushtuesi. Edhe pushtuesi ka qenë më i ndjeshëm. Vetëm ISIS ka shkatërruar veprat kulturore e talibanët. Forcë e ndërgjegjshme strukturore nuk e bën këtë gjë. Këta nuk janë politikanë, por kanë vepruar si banditë”, tha Marku.
Mark Marku ka kujtuar sesi popujt e ruajnë trashëgiminë e tyre kulturore.
“Francezët nuk ndërtuan një Notre Dame tjetër. Ata e ndërtuan sërish. Praga që ka 1 milionë e 500 mijë banorë diku, ata kanë mbi 1700 teatro. Pse të mos ndërtonim teatrin e ri tek Bulevardi i Ri. Bulevardin shoqëroje me ndërtime të reja. Duhet të bënte atje. Por e shikojnë si truall për ndërtime, e ruajnë për pazare private”, u shpreh Marku.
Më tej, Marku vlerësoi se edhe të huajt, ambasadorët janë shprehur kundër prishjes së godinës së Teatrit.
“Edhe ambasadori gjerman, edhe ai britanik, edhe ambasadori i BE, edhe të tjerë që kanë shprehur tronditje, sic janë tronditur të gjithë shqiptarët. Shqetësimi i tyre ishte i qartë dhe mos-aprovim me gjuhë diplomatike. Cfarë do mendonte një i huaj që shembet Teatri brenda natës. Italia u trondit për një varr të cënuar. Janë komunistë që po ju tha Edi Rama që dilni natën dhe shkatërroni cdo gjë mund të dalin. Në rrjete sociale kishte tërbim ndaj Edi Ramës. Opozita veproi drejt”, vlerësoi Marku.