Kryeministri në detyrë, Albin Kurti, ka deklaruar se mes rezultatit të zgjedhjeve dhe kërkesave të Lidhjes Demokratike të Kosovës ekziston një mospërputhje e madhe. Pas takimit me liderin e LDK-së, Lumir Abdixhikun, Kurti bëri të ditur se palët ende nuk kanë arritur një marrëveshje politike, pasi qëndrimet dhe pritshmëritë e tyre vazhdojnë të jenë të ndryshme.
Ai theksoi se fokusi duhet të jetë te gjetja e një zgjidhjeje që do të shmangte një proces të ri zgjedhor. Sipas Kurtit, çdo marrëveshje duhet të përfshijë edhe çështjen e zgjedhjes së presidentit, pasi një konstituim i Kuvendit pa një dakordim për këtë çështje mund ta çojë vendin sërish në një krizë politike.
“Nuk kemi ende marrëveshje politike. Unë jam i bindur që duhet të përqendrohemi përpara, që nënkupton edhe evitimin e zgjedhjeve të reja parlamentare, të cilat, sikurse ato të mëhershmet, ishin të panevojshme, të paarsyeshme e, madje, edhe të dëmshme për buxhetin dhe ekonominë e vendit. Nuk është e mundur ndryshe pa një marrëveshje për çështjen e zgjedhjes së presidentit.
Në kushtet kur zgjedhim kryetarin dhe Kryesinë e Kuvendit, por më pas vijmë sërish te problemi i presidentit, kjo është një formulë tashmë e provuar dhe me të njëjtën metodë nuk mund të kemi rezultat tjetër. Kjo do të na çonte në shpërndarjen e Kuvendit. Marrëveshjen politike nuk e kemi ende, pritjet janë të ndryshme, qëndrimet nuk përputhen dhe është bindja ime se ka një dallim drastik mes rezultatit zgjedhor dhe kërkesave të LDK-së”, tha Kurti.