Vetëm katër orë larg Mbretërisë së Bashkuar, ekziston një fshat i bukur që është shtëpia e brigjeve mahnitëse, i njohur si Maldivet e Evropës, dhe ku vizitorët nuk ngopen me peizazhet e bukura që ofron ky vend, shkruan Alycia McNamara për prestigjiozen britanike ”Express”.
Ksamili është një fshat i vogël bregdetar në jug të vendit.
Ndodhet përgjatë detit Jon, rreth 15 kilometra në jug të Sarandës dhe pranë ishullit grek të Korfuzit. Fshati ndodhet në Parkun Kombëtar të Butrintit, një zonë e mbrojtur nga UNESCO, me detin në anën perëndimore dhe me një liqen në lindje. Në një llogari në TikTok nën emrin Saranda_events, një person postoi një video të plazheve kristalore me një mbishkrim që thotë “zbuloni Ksamilin, Shqipëri: Maldivet e Evropës! Eksploroni bukurinë marramendëse të Ksamilit, një perlë e vërtetë në Evropë. Zhytuni në plazhet mahnitëse dhe përjetoni një kulturë të gjallë”.
Në komente, një tjetër person shkroi ”vendi më i bukur në botë”.
Një tjetër shkroi ”mos më fol për Maldivet, se Ksamili është edhe më mirë!”.
Një vend që duhet vizituar patjetër në zonë është plazhi ”Lori”. Një vizitor në Tripadvisor tha se është ”një plazh i mrekullueshëm me rërë të butë, vërtet i këndshëm nëse doni të relaksoheni ose të argëtoheni, e rekomandoj shumë. Ka edhe një bar dhe pije vërtet të shkëlqyera”.
”Sunshine Seeker” thotë se koha më e mirë për të vizituar Ksamilin është gjatë stinëve të shkurtra, nga maji deri në qershor, dhe në fund të shtatorit ose fillim të tetorit.
Thuhet se në këto periudha, moti është ende i ngrohtë dhe deti është perfekt për not.
Nëse jeni duke kërkuar një destinacion pushimesh për vitin 2026, duhet ta merrni në konsideratë këtë pjesë të bukur të Evropës.