Qyteti i artit, kulturës dhe traditës njihet ndryshe edhe si “Shkodra e luleve”, ku autorë të ndryshëm i kanë kushtuar luleve mbi 150 tekste këngësh. Oborret karakteristike të shtëpive shkodrane të urojnë mirëseardhjen mes luleve shumëngjyrëshe dhe aromave të trëndafilit, karafilave, luleborës e jaseminit. Në Shkodër është kthyer në traditë tashmë që çdo 6 dhe 7 maj maj të festohet “Dita e luleve”. Kjo festë i vesh rrugët kryesore të qytetit me lule nga më të ndryshmet, duke krijuar një atmosferë ngjyrash e pranvere.
Prej dy ditësh në qytetin verior po zhvillohen një sërë aktivitetesh, si mbjellje lulesh në lulishtet e qytetit që ishte edhe risia e këtij viti, gara vallëzimi modern në kuadër të “Bilbilat e vegjël të Shkodrës këndojnë”, organizuar nga Qendra Kulturore e Fëmijëve, “Panairi i Luleve” me pjesëmarrjen e fëmijëve të kopshteve dhe të shkollave 9-vjeçare të Bashkisë Shkodër, konkurs “Poezia e luleve”, konkursi i fotografisë “Lulet e qytetit tim”, konkurs “Miss biçikleta”, koncerte etj.
Dita e luleve ka krijuar një atmosfere festive jo vetëm tek të rriturit, por edhe tek fëmijët.
Bashkia Shkodër në këtë ditë përcjell mesazhin e kujdesit ndaj natyrës dhe traditës. Bahçet shkodrane janë të njohura për lulet shumëngjyrëshe e plot aromë si karafilat, trëndafilat, lule borën, lule krapin, etj, që i kanë dhënë këtij qyteti jo vetëm emrin, por edhe bukurinë e hijeshinë.
Shkodra jo vetëm pa biçikletën, por edhe lulet nuk mund të kuptohet prandaj çdo vit në 6 maj festohet “Dita e Luleve”, mes panaireve, këngëve e aktiviteteve të ndryshme që përfshijnë të gjitha moshat, duke i dhënë kështu një mesazh shprese kësaj tradite që përcillet tek brezat e rinj duke garantuar ruajtjen e një vlere. E vërteta është se oborret e vjetra të Shkodrës kanë një traditë të hershme të lidhur me lulet.